Belarýs eliniń «Belavia» ulttyq áýe kompaniiasy Irak, Siriia jáne Iemen azamattaryn Túrkiiadan Belarýske tasymaldaýyn toqtatady, dep habarlaidy QazAqparat TASS agenttigine silteme jasap.
«Túrkiianyń quzyrly organdarynyń sheshimi boiynsha, 2021 jyldyń 12 qarashasynan bastap Irak, Siriia, Iemen azamattary Túrkiiadan Belarýske ushyrylatyn reisterge qabyldanbaidy», - delingen kompaniia baspasóz qyzmetiniń juma kúni jariialaǵan, habarlamasynda.
Onda «Belavia» áýe kompaniiasynyń tyiym salynǵan jolaýshylary áýe biletin satyp alǵan jerge tapsyryp, aqshasyn qaitaryp alatyny atap ótildi. Buǵan deiin Belarýs pen Polsha shekarasyndaǵy kóshi-qon daǵdarysyna bailanysty Turkish Airlines áýe kompaniiasynyń Irak, Siriia jáne Iemen azamattaryna óz reisine bilet satpaityny habarlanǵan. Biletterdi tek diplomatiialyq tólqujaty bar azamattar ǵana satyp alady. Jyl basynan beri migranttar kóptep jinalǵan Belarýs pen Latviia, Litva men Polsha shekarasyndaǵy migratsiialyq jaǵdai 8 qarashada kúrt shielenisken.
Belarýs jaqtan Polsha shekarasyna qarai birneshe myńdaǵan adam jinalyp, shekara aimaǵynan ketpeýde. Olardyń kóbi Polshaǵa tikendi symnan jasalǵan bógetti buzyp ótpek bolǵan.
EO elderi Minskini «daǵdarysty ádeii ýshyqtyrdy» dep aiyptap, sanktsiia salýdy usyndy.
Belarýs prezidenti Aleksandr Lýkashenko bul jaǵdaiǵa Batys elderin kinálap otyr, onyń aitýynsha, batys elderi áreketiniń saldarynan adamdar elindegi soǵystan qashyp júr.
