Belarýs sportshysy Iana Maksimova eline qaitpaitynyn aitty. Osyǵan deiin jeńil atlet Kristina Timanovskaia da eline oralýdan bas tartyp, Eýropadan saiasi baspana suraǵan.
"Ókinishke qarai, ol jaqta bas bostandyǵynan aiyrylyp qana qoimai, ólip te qalýyń múmkin... Munda ózińdi erkin ustap, óz adamdaryńnyń, dostaryńnyń, týystaryń men jaqyndaryńnyń bostandyǵy úshin kúrese alasyń. Biz mindetti túrde jeńemiz" dep jazdy Maksimova.
Atlet sport mansabyn odan ári jalǵastyra alatynyna, kelesi olimpiadaǵa qatysa alatynyna úmittenedi.
Sportshy qazir Germaniiada júr. Onymen birge kúieýi Andrei Kravchenko da oralýdan bas tartqan. Kravchenko 2008 jylǵy olimpiadada onsaiys boiynsha kúmis júldeger atanǵan.
"Kóp oilanyp, Belarýske oralmaý týraly sheshim qabyldadyq" dep jazdy Maksimova.
Sportshy kópsaiys jarysyna qatysady. Biyl maýsymda ol Belarýs kýbogyn jeńip alǵan. Biraq kvalifikatsiialyq normativterdi oryndai almaǵandyqtan, olimpiada oiyndaryna qatysa almady.
Osyǵan deiin "Nasha Niva" basylymy "Vitiaz" gandbol klýbynyń jattyqtyrýshysy Konstantin Iakovlevtiń Belarýsten ketkenin jazǵan. Biyl maýsymda ony ruqsat etilmegen jiynǵa qatysty dep 15 táýlikke qamaǵan.
- Jeksenbi, 1 tamyz kúni Belarýs olimpiada komitetiniń ókilderi jeńil atlet Kristina Timanovskaiany jarystan shettetip, Tokiodan kúshtep alyp ketýge árekettengen. Olar mundai qadam sportshyny syni post jazýynan keiin barǵan. Timanovskaia Instagram-jelisinde óz eliniń delegatsiiasyn renish bildirip, olardyń sheshimin synaǵan.
- Tokio áýejaiynda ol politsiiaǵa júginip, qorǵaýyn suraǵan. Sportshy elinde qýdalaýy múmkin dep alańdaidy. Polshanyń Japoniiadaǵy elshligi jeńil atletke gýmanitarlyq viza berip, onyń óz mansabyn Varshavada jalǵastyra alatynyn aitty.
