بەلارۋس سپورتشىسى يانا ماكسيموۆا ەلٸنە قايتپايتىنىن ايتتى. وسىعان دەيٸن جەڭٸل اتلەت كريستينا تيمانوۆسكايا دا ەلٸنە ورالۋدان باس تارتىپ, ەۋروپادان ساياسي باسپانا سۇراعان.
"ٶكٸنٸشكە قاراي, ول جاقتا باس بوستاندىعىنان ايىرىلىپ قانا قويماي, ٶلٸپ تە قالۋىڭ مٷمكٸن... مۇندا ٶزٸڭدٸ ەركٸن ۇستاپ, ٶز ادامدارىڭنىڭ, دوستارىڭنىڭ, تۋىستارىڭ مەن جاقىندارىڭنىڭ بوستاندىعى ٷشٸن كٷرەسە الاسىڭ. بٸز مٸندەتتٸ تٷردە جەڭەمٸز" دەپ جازدى ماكسيموۆا.
اتلەت سپورت مانسابىن ودان ەرٸ جالعاستىرا الاتىنىنا, كەلەسٸ وليمپياداعا قاتىسا الاتىنىنا ٷمٸتتەنەدٸ.
سپورتشى قازٸر گەرمانييادا جٷر. ونىمەن بٸرگە كٷيەۋٸ اندرەي كراۆچەنكو دا ورالۋدان باس تارتقان. كراۆچەنكو 2008 جىلعى وليمپيادادا ونسايىس بويىنشا كٷمٸس جٷلدەگەر اتانعان.
"كٶپ ويلانىپ, بەلارۋسكە ورالماۋ تۋرالى شەشٸم قابىلدادىق" دەپ جازدى ماكسيموۆا.
سپورتشى كٶپسايىس جارىسىنا قاتىسادى. بيىل ماۋسىمدا ول بەلارۋس كۋبوگىن جەڭٸپ العان. بٸراق كۆاليفيكاتسييالىق نورماتيۆتەردٸ ورىنداي الماعاندىقتان, وليمپيادا ويىندارىنا قاتىسا المادى.
وسىعان دەيٸن "ناشا نيۆا" باسىلىمى "ۆيتياز" گاندبول كلۋبىنىڭ جاتتىقتىرۋشىسى كونستانتين ياكوۆلەۆتٸڭ بەلارۋستەن كەتكەنٸن جازعان. بيىل ماۋسىمدا ونى رۇقسات ەتٸلمەگەن جيىنعا قاتىستى دەپ 15 تەۋلٸككە قاماعان.
- جەكسەنبٸ, 1 تامىز كٷنٸ بەلارۋس وليمپيادا كوميتەتٸنٸڭ ٶكٸلدەرٸ جەڭٸل اتلەت كريستينا تيمانوۆسكايانى جارىستان شەتتەتٸپ, توكيودان كٷشتەپ الىپ كەتۋگە ەرەكەتتەنگەن. ولار مۇنداي قادام سپورتشىنى سىني پوست جازۋىنان كەيٸن بارعان. تيمانوۆسكايا Instagram-جەلٸسٸندە ٶز ەلٸنٸڭ دەلەگاتسيياسىن رەنٸش بٸلدٸرٸپ, ولاردىڭ شەشٸمٸن سىناعان.
- توكيو ەۋەجايىندا ول پوليتسيياعا جٷگٸنٸپ, قورعاۋىن سۇراعان. سپورتشى ەلٸندە قۋدالاۋى مٷمكٸن دەپ الاڭدايدى. پولشانىڭ جاپونيياداعى ەلشلٸگٸ جەڭٸل اتلەتكە گۋمانيتارلىق ۆيزا بەرٸپ, ونىڭ ٶز مانسابىن ۆارشاۆادا جالعاستىرا الاتىنىن ايتتى.
