Belorýstyq TikTok-bloger Andrei Beliavskii "Lýkashenkony qorlaǵan" rolikteri úshin eki jyl bas bostandyǵynan aiyrý jazasyna kesildi. Ol jazasyn jalpy rejimdegi koloniiada óteidi. Bul jóninde "Viasna" quqyq qorǵaý ortalyǵy habarlady, dep jazady Azattyq.
Beliavskii Belarýs qylmystyq kodeksiniń "prezidentti qorlaý" (368-bap) baby boiynsha kináli dep tanyldy. Quqyq qorǵaýshylardyń aitýynsha, sýdia isti qaraýdy bastaǵan soń birneshe saǵat ishinde jyldam úkim shyǵarǵan.
Aiyptaýshylardyń aitýynsha, Beliavskii 2022 jylǵy 20 jáne 26 qańtarda "TikTok áleýmettik jelisinde Aleksandr Lýkashenkony qorlaityn eki videorolik jariialaǵan".
TikTok-blogerdi 28 sáýirde jumys ornynda – ózine tiesili "Velosportmeister" velosiped dúkeninde qamaýǵa alǵan. Qamaý kezinde Beliavskiidiń qasynda kámeletke tolmaǵan uly bolǵan, keiin bala ata-ájesine tabystalǵan.
Bloger sot májilisi kezinde kinásin tolyq moiyndaǵan. Memlekettik aiyptaýshy oǵan eki jyl bostandyǵynan aiyrý jazasyn suraǵan, sot onymen kelisti. Buǵan qosa Beliavskiidiń "qylmys jasaý quraly" dep tanylǵan telefony tárkilendi.
Bobrýisk qalasynyń 45 jastaǵy turǵyny Andrei Beliavskiidiń qoǵamdyq-saiasi máselelerdi aitatyn "Suraǵym bar" degen TikTok akkaýntyna 100 myńdai adam jazylǵan. Belarýstiń uiymdasqan qylmys jáne jemqorlyqpen kúres basqarmasy akkaýntty buzǵan deidi quqyq qorǵaýshylar.
