Belarýstiń ONT memlekettik telearnasy beisenbi kúni keshke qamaýdaǵy oppozitsiialyq jýrnalist Roman Protasevichtiń videosyn jariialady. Áńgime barysynda ol "jappai tártipsizdik uiymdastyrǵanyn" moiyndaidy. Videonyń qashan, qaida jáne qandai jaǵdaida túsirilgeni belgisiz. 23 mamyrda Vilniýske ushyp bara jatqan ushaq májbúrli túrde Minskige qondyrylyp, salonnan ustap áketilgen Roman Protasevich sodan beri tergeý izoliatorynda qamaýda otyr.
ONT telearnasynda kórsetilgen siýjette oppozitsiialyq NEXTA telegram-arnasynyń burynǵy bas redaktory ózine aiyp taǵylǵannan keiin "ruqsat etilmegen jappai aktsiiany uiymdastyrǵanyn" birden moiyndaǵanyn jetkizedi.
"Arasynda men de jariialaǵan urannyń saldarynan kóshede tártipsizdikter bastaldy. Minsk úsh kún haosta ómir súrdi" dedi oppozitsiialyq bloger. Ol sonymen birge belorýs oppozitsiiasynyń birqatar ókilderin "synap", Aleksandr Lýkashenkony "qadirleitinin" aitqan.
Roman Protasevich negizin qalaǵan NEXTA teleagram-arnasy byltyr Belarýste prezident sailaýynan keiin bastalǵan jappai narazylyqtan úzdiksiz habar taratqan. Keiingi kezde Protasevich "Belarýs golovnogo mozga" atty telegram arnasyn júrgizip, Litvada turǵan.
Belarýs biligi Protasevichti terrorizmmen aiyptalǵandardyń tizimine engizgen. Minskide onyń ústinen "jappai tártipsizdik uiymdastyrý" jáne "áleýmettik alaýyzdyq qozdyrý" baptary boiynsha is qozǵalǵan. Jýrnalist sonymen birge "memlekettik qupiiany jaidy" jáne "prezidentke til tigizdi "dep te aiyptalyp otyr.
24 mamyrda Belarýs telearnasy Roman Protasevichtiń videomálimdemesin jariialaǵan. Videoda ol Minskidegi tergeý izoliatorynda qamaýda otyrǵanyn, ózimen "durys" qatynas jasap jatqanyn aitady. Ol ózine taǵylǵan aiyptar boiynsha jaýap berip jatqanyn da aityp ótken. Jýrnalistiń anasy Natalia Protasevich kúshtik qurylymdar ulyna kúsh qoldanyp, sol sózderdi aitýǵa májbúrledi dep sanaidy. Jaqtastary da solai oilaidy. Belarýste narazylyqty basyp-janshý kezinde myńdaǵan adam soqqyǵa jyǵylyp, azaptaýǵa ushyrady.
Ushaqty májbúrli túrde qondyryp, Protasevichti ustaýdy Batys elderi ótkir synap, Minskige jańa sanktsiia ázirlep jatyr.
