Halyqaralyq jeńil atletika federatsiiasy 2022 jyly sporttyq júrý boiynsha álem chempionatyn Minsk qalasynda ótkizbeý jónindegi sheshim qabyldady.
Uiym málimdemesinde qazir jarysty ótkizý jóninde basqa eldermen sóilesip jatqany, onyń qorytyndysy jóninde keiinirek málimet beriletini jazylǵan.
"Jarysty basqa qalada ótkizý sheshimi qaýip-qaterdi anyqtaityn komitet baiandamasynan keiin qabyldandy. Baiandamada Belarýspen diplomatiialyq qarym-qatynastardyń anyq bolmai jatqany jáne bul ólkege barýdaǵy shekteýler qaýip-qaterdi kúsheitedi" dep jazylǵan málimdemede.
Ótken aptada Minskte triatlon boiynsha jarysqa qatysyp jatqan úsh velosipedshi ustalyp, sot sheshimi boiynsha ekeýi 15 táýlikke, bireýi 14 táýlikke qamaýǵa alynǵan. Buǵan olardyń jarys kezinde "narazylyq retinde urandar aityp aiqailaǵany" sebep bolǵany habarlanǵan.
Osyǵan deiin Minsk Hokkei boiynsha 2021 jyly álem chempionatyn ótkizý quqyǵynan aiyrylǵan. Naýryzda Halyqaralyq Olimpiada komiteti Aleksandr Lýkashenkonyń uly Viktor Lýkashenkony Belarýstyń Ulttyq olimpiada komitetiniń jańa basshysy retinde tanýdan bas tartqan.
Mamyr aiynda Biatlonshylardyń halyqaralyq birlestigi 2022 jyly naýryzda ótetin Biatlon boiynsha álem kýbogyn Belarýstan Finliandiiaǵa aýystyrý jóninde sheshim qabyldaǵanyn jariialaǵan.
Budan bólek Belarýs Klassikalyq paýerlifting boiynsha álem chempionatyn ótkizý quqyǵynan aiyrylyp, jarysty Shvetsiiada ótkizý sheshimi qabyldanǵan.
2020 jyldyń tamyz aiyndaǵy prezident sailaýynan keiin saiasi oppozitsiia men táýelsiz baspasóz ókilderin aiaýsyz qýdalaǵan Lýkashenko rejimine halyqaralyq qaýymdastyq qysym kórsetip keledi.
Eýroodaq jáne AQSh, odan ózge elder Belarýstegi prezident sailaýynyń resmi nátijesin moiyndaýdan bas tartqan. Olar Lýkashenkony el basshysy dep sanamaidy.
