Belarýs-Polsha shekarasyndaǵy ótkizý beketiniń janyndaǵy lagerdegi bosqyndar kishigirim toptarǵa bólindi. Olar kólik-logistikalyq ortalyqqa qarai jiberildi, dep habarlaidy QazAqparat Belta agenttigine silteme jasap.
Aita ketsek, olarǵa Belarýs Prezidenti Aleksandr Lýkashenkonyń buiryǵymen uiymdastyrylǵan ýaqytsha ornalastyrý beketine ótýge birneshe ret usynys jasalǵan. Kólik-logistikalyq ortalyqta olar barlyq kerek zattarmen qamtamasyz etilgen. Bosqyndarǵa jyly kiimder berilgen, tamaqtandyrý uiymdastyrylǵan. Olarǵa bilik organdarymen qosa, qoǵamdyq uiymdar da kómek kórsetýde, táýlik boiy dárigerler kúzetýde.
Belarýs tarapy shekarada qalyp qoiǵan adamdarǵa kómek kórsetý úshin qoldan kelgenin bárin jasap jatqanyn habarlady.
Euronews jazýynsha, Belarýs-Polsha shekarasynda myńdaǵan migranttyń jinalǵany Belarýstiń basqa da kórshilerine belgi boldy. Latviia shyǵystaǵy shekarasyn nyǵaityp jatyr: respýblika biligi 37 shaqyrym qashyqtyqty quraityn ýaqytsha qorshaý salýdy qarjylandyrýda. Qorshaý barlyq jerge ornatylmaýy múmkin, sebebi shekarada ózen men balshyq jerler bar. Riga resmi túrde kelesi jyldyń aqpanyna deiin shekaradaǵy aimaqqa tótenshe jaǵdai rejimin sozdyrýǵa ruqsat berdi.
Latviianyń shekara qyzmetiniń general-leitenanty Iýris Kýsinsh bylai dedi: «Biz daýys zoraitqyshpen kúrd, arab, aǵylshyn jáne orys tilinde Latviia aýmaǵyna zańsyz kirgender jaýapqa tartylatynyn eskertip jatyrmyz. Kóptegen jaǵdaida adamdardyń qaita ketýine osy da jetkilikti shyǵar».
Belarýstiń taǵy bir shekaralas kórshisi - Litva migranttardy itterdiń kómegimen qýyp shyqqandy teriske shyǵardy. Ondai videony Belarýs Memlekettik shekara komiteti taratty. Litva tarapynyń málimetinshe, ol jalǵan aqparat.
