Belarýs prezidenttigine kandidat bolǵan Svetlana Tihanovskaia eldegi saiasi daǵdarysty sheshý úshin resmi Minskini dialogqa shaqyrdy.
9 tamyzda ótken prezident sailaýynda eldi 26 jyl basqarǵan Aleksandr Lýkashenko jeńimpaz dep jariialanǵan soń elde narazylyq sharasy kúsheigen. OSK Lýkashenko 80 paiyz, Tihanovskaia 10 paiyz daýys aldy dep jariialaǵan. Halyq sailaý nátijesimen kelispeidi.
Qazir Litvada júrgen Tihanovskaia 25 tamyzda Eýroparlamenttiń syrtqy ister komitetimen videobailanys kezinde Belarýs biliginen "saiasi quqyqty qurmetteýdi", "saiasi tutqyndardy bosatýdy", "halyqty qorqytyp-úrkitýdi" jáne "qýdalaýdy toqtatýdy" talap etti.
"Belarýs oiandy. Biz endi oppozitsiia emespiz, biz – halyqpyz" dedi ol.
Tihanovskaianyń sózinshe, 23 tamyzdaǵy narazylyq sharasyna 200 myńnan asa adam shyqqan. Ol "búkil álem elderin" Belarýs halqynyń "erkindik pen ádildikke umytylysyn", "Belarýs eliniń táýelsizdigi men shekara tutastyǵyn" qurmetteýge shaqyrdy.
Tihanovskaia Belarýs biliginiń "mitingige shyqqan halyq zorlyq-zombylyq pen buzaqylyq jasady" degen málimdemesin joqqa shyǵardy.
"Beibit revoliýtsiia bolyp jatyr" dedi ol. Tihanovskaianyń sózinshe, Belarýstegi narazylyqtyń antireseilik ia antieýropalyq sipaty joq.
