Italiiadaǵy Belarýs elshiliginiń aýmaǵynda jarylys boldy. Oqiǵa ornyna kelgen Italiia politsiiasynyń qyzmetkerleri aldyn ala baǵa berý arqyly bul oqiǵany terroristik shabýyl dep atady, - dep habarlaidy Tengrinews.kz tilshisi BelTA agenttigine silteme jasap.
Vedomstvonyń málimetinshe, 9 naýryzda saǵat 4.03-4.05-te betperde kigen eki belgisiz adam Belarýs elshiligi mekemesiniń ǵimaratyna jaqyndap, elshilik aýmaǵyna eki jarylǵysh zat tastaǵan. Osydan keiin shabýyldaýshylar oqiǵa ornynan birden izin sýytqan.
Qurylǵylardyń biri qosylmai, jarylmai qalǵan, al ekinshisi gaz qubyrynyń janynda jarylǵan. Dipmissiia qyzmetkerleri zardap shekken joq.
"Jarylys saldarynan elshilik ǵimaratyna aitarlyqtai ziian keldi. Onyń ishinde elshilik ǵimaratynyń terezeleri synyp, jarylys tolqynymen 1,5 metrlik ishki qorshaýdan ushyp ketken metall oryndyq qirap, 5-7 metrge yǵysqan, elshilik qabyldaýǵa kelgen adamdarǵa arnalǵan zattardy saqtaityn metall shkaf, jekelegen beton plitalar jáne t.b. zattar qirady.
Italiianyń quqyq qorǵaý organdarynyń qyzmetkerleri barlyq qajetti tergeý áreketterin jasap, tiisti jumystar júrgizilip jatyr. Italiia tarapy sheteldik mekemeni kúzetýdi kúsheitýge daiyn ekenin málimdedi", - delingen Belarýs SIM habarlamasynda.
