Halyqaralyq olimpiada komiteti (HOK) men Tokiodaǵy Olimpiada oiyndaryn uiymdastyrý komitetiniń ókilderi belorýs sportshysy Kristina Timanovskaiamen tikelei sóilesti. Bul týraly HOK baspasóz qyzmetine súiengen TASS agenttigi habarlady, dep jazady Azattyq.
Buǵan deiin japonnyń Sports Hochi basylymy Timanovskaiany qaýipsiz jerge kóshiredi dep habarlaǵan bolatyn.
2 tamyz túnde taratqan HOK málimdemesinde komitet músheleri men Japoniia resmi tulǵalarynyń Timanovskaiamen tikelei tildeskeni jazylǵan.
HOK ókili Mark Adamstyń sózine qaraǵanda, ol áýejaidaǵy qonaqúige qonyp shyqqan, onyń qaýipsizdigin politsiia qamtamasyz etip jatyr.
HOK belorýs sportshysyn qoldaitynyn jáne dúisenbi kúni tańerteń onymen taǵy da sóilesetinin habarlady.
Osyǵan deiin belorýs úkimetine narazylardy jyly qabyldaǵan kórshi Polsha belorýs sportshysyna kómekteskisi keletinin aitty.
Polsha syrtqy ister vitse-ministri Martsin Pshidach Twitter-de Timanovskaiaǵa gýmanitarlyq viza usynylyp, eger qalasa, Polshada karerasyn jalǵastyrýǵa múmkindik jasalatynyn jazdy.
Chehiia syrtqy ister ministri Iakýb Kýlhanek Belarýs tóńiregindegi jaǵdaidy "daýly" dep atap, Chehiia Timanovskaiaǵa kómektesýge daiyn dep málimdedi.
"Biz oǵan elge kirýge múmkindik beretin viza usynamyz, osylaisha halyqaralyq kómekke qol jetkizý úshin ótinish bere alady. Bizdiń Tokiodaǵy elshiligimiz de kómektesýge daiyn" dedi cheh diplomaty.
Birneshe saǵattan soń Timanovskaia Japoniiada qaýipsiz jerde ekenin jáne ózin politsiia kúzetip turǵanyn habarlady. Onyń habarlamasyn BSSF qorynyń Telegram arnasy jariialady.
BSSF ókili Aleksandr Opeikin AP agenttigine Timanovskaia Aleksandr Lýkashenko úkimeti jaqtastarynyń nysanyna ainaldy dep málimdedi. Onyń aitýynsha, Timanovskaia Avstriia elshiliginen saiasi baspana suramaq.
BSSF qory - byltyr tamyz aiynda Belarýste "ádiletsiz sailaýdan" keiin tutanǵan narazylyq kezinde sportshy Aleksandra Gerasimenkonyń zeinetaqysyna qurylǵan qor. Atalǵan uiym bilik qysymyna ushyraǵan belorýs sportshylaryna qarjylai jáne zańgerlik kómek beredi. Qor buǵan deiin demonstranttarǵa kúsh qoldanbaýdy talap etken.
Qańtar aiynda shamamen 350 sportshy ashyq hatqa qol qoiyp, prezident sailaýynyń resmi nátijesiniń kúshin joiýǵa jáne barlyq saiasi tutqyndardy, jappai narazylyq kezinde ustalǵandardy bosatýǵa shaqyrǵan.
Buǵan deiin oppozitsiialyq Belorýs sport yntymaqtastyǵy qory ókilderi bilik Timanovskaiany Tokiodan kúshpen áýetýge tyrysyp jatyr dep málimdegen. Aqparatqa qaraǵanda, buǵan sportshynyń áleýmettik jelide belorýs trenerlerin ótkir synap jazǵany túrtki bolǵan.
2 tamyzda Timanovskaia 200 metrge júgirýden jarysqa qatyspaq bolǵan. Biraq onyń sózine qaraǵanda, 1 tamyzda onyń bólmesine qurama qyzmetkeri kelip, kúshpen áýejaiǵa alyp ketken. Áýejaida sportshy politsiiadan kómek suraǵan. Belorýs olimpiada komiteti depoortatsiialaý týraly sheshim sportshynyń emotsionaldy-psihologiialyq kúiine bailanysty qabyldanǵanyn habarlady.
