Tokio Olimpiadasynda alǵashqy jekpe-jekte reseilik qarsylasynan jeńilgen qazaqstandyq boksshy Bekzad Nurdáýletov jaqyndary men jankúierlerine alǵys aitty.
Bul týraly boksshy Instagram-daǵy paraqshasynda jazdy.
"Alǵa qoiǵan maqsatymyzǵa jete almadyq. Bári biz oilaǵandai bola bermeidi. Bokstaǵy 13 jyldyń ishinde qanshama eńbek, ter, jaraqat pen qan ketti, osynyń bári sol bala kezdegi Bekzadtyń armanynan bastalǵan bolatyn. Qandai jaǵdai bolmasa da qasymda tabylatyn otbasyma, baýyrlaryma, jaqyndaryma jáne shyn janashyr jandarǵa alǵys aitamyn! Neler kelip, ne ketpes er jigittiń basyna", - dep jazdy Nurdáýletov.
Álem chempiony Bekzad Nurdáýletov Tokio Olimpidasynda 28 shilde kúni synǵa tústi.
81 kelige deiingi salmaq dárejesi boiynsha ótken alǵashqy jekpe-jekte qazaqstandyq reseilik Imam Hataevpen judyryqtasty.
Jekpe-jekti eki ret toqtatýǵa týra keldi. Boksshylardyń ekeýi de jaraqat aldy. Degenmen tóreshiler sheshimimen reseilik boksshy jeńiske jetti. Qorytyndy esep – 1:4.
Aita keteiik, Olimpiadada tórt boksshymyz qaldy. Zakir Safiýllin (63 keli) men Sáken Bibosynov (52 keli) alǵashqy jekpe-jekterin sátti ótkizgen. Ábilhan Amanqul (75 keli) ózbek boksshysy Fanat Qahramonovty aiqyn basymdyqpen jeńdi. Asa aýyr salmaq dárejesinde mysyrlyq boksshymen jekpe-jekke shyqqan Qamshybek Qońqabaev 5:0 esebimen basym tústi.
Al Qazaqstannyń áielder komandasy atynan Tokio Olimpiadasyna barǵan jalǵyz boksshy Nadejda Riabets (75 keli) birinshi jekpe-jekte utylsa, Serik Temirjanov (57 keli) ekinshi ainalymnan asa almady. Budan bólek, 69 keli salmaq dárejesinde Abylaihan Júsipov amerikalyq boksshyǵa jol berdi. Al Vasilii Levit (91 keli) nokaýtpen utyldy. Álem chempiony Bekzad Nurdáýletov te birinshi jekpe-jekte reseilik boksshydan jeńilip qaldy.
