Senator Áli Bektaev aýyl turǵyndary tap bolǵan áleýmettik qiyndyqtarly tize kele Úkimet basshysyna depýtattyq saýal joldady, dep habarlaidy "Ult aqparat".
Depýtattar búginge deiin Biryńǵai jinaqtaýshy zeinetaqy qorynda jinalǵan 10 trillion teńgeden astam qarjyny tiimdi paidalaný jaiynda óz oilaryn ortaǵa saldy. Qazirgi tańda 1988 jyldyń 1 qańtarynda jumys ótili 25 jylǵa tolǵan er azamattarǵa jáne 20 jylǵa tolǵan áielderge tapqan orta tabysynyń 60 paiyzyn zeinetaqy retinde tóleý tártibi qarastyrylǵan. Munyń ózi aýyldyqtardyń kópshiligine berilmeitin bolyp shyqty. Sebebi, aýyl sharýashylyǵy jumystarynyń negizinen maýsymdyq bolýyna bailanysty kóp eńbekkerlerdiń jumys ótili 20-25 jylǵa jetpeidi.
Senator Qazaqstan Respýblikasynyń 2030 jylǵa deiingi merzimge arnalǵan zeinetaqy júiesin jańǵyrtý týraly tujyrymdamasynyń jobasymen muqiiat tanysyp, odan eshqandai jańalyq kórmegenin atap ótti. Onda tek kepildendirilgen tómengi zeinetaqy degen uǵym engizilgen kórinedi. Sonda aýyldaǵy zeinetkerler sol tómengi zeinetaqymen qala beretin bolady. Senator mundai tujyrymdamany múldem qabyldaýǵa bolmaidy dep esepteidi.
«Jańa qabyldanatyn tujyrymdama, aýyl zeinetkerleriniń zeinetaqysyn kóterýdiń, aýyl eńbekkerleriniń zeinetaqy jinaqtaryn kóbeitýdiń joldaryn qarastyratyn, sol aýyldardyń zeinetaqy qarjylarynyń saqtalýyn kepildendiretin qujat bolýy kerek dep oilaimyn», – dedi Áli Bektaev.
Senator Qazaqstanda jańa áleýmettik saiasat engizý kerek dep sanaidy. Ol saiasat negizinen balalardy qorǵaýǵa jáne qoldaýǵa baǵyttalýy kerek.
«Balalar – bizdiń bolashaǵymyz. Eger biz búgin olarǵa eń tómengi kedeilik sheginiń 70 paiyzyna teń áleýmettik járdemaqy berip kelsek, onda erteń olardan Otanǵa degen patriotizm men súiispenshilikti talap etýge eshqandai quqyǵymyz bolmaidy», – dedi depýtat.
Senator Áli Bektaev memleket balalarǵa arnalǵan barlyq járdemaqylardy jinaqtap, balalardyń árqaisysyn, turmystyq jaǵdaiyna qaramai, týǵannan 18 jasqa tolǵanǵa deiin kepildi jáne mindetti túrde áleýmettik qoldaýdyń jańa standarttaryn engizýdi usynyp otyr. Ol «bala kapitaly» degen ataýmen arnaiy kartochkalar arqyly ár balanyń qajetine ǵana jumsalýy tiis.
«Balalardyń úidegi jaǵdaiyn qalyptastyrý maqsatynda ómirge otbasylardy súiemeldeý institýtyn, otbasynyń saýlyq indeksin, otbasylardyń áleýmettik kartalaryn engizý siiaqty sharalar qabyldanýy kerek dep oilaimyz. Ásirese, qazaqstandyqtardy qalalyq, aýyldyq dep bólmei, olarǵa áleýmettik kepildikterge birdei jaǵdai týǵyzý maqsatynda barlyq áleýmettik biýdjetti biriktiretin biregei áleýmettik qor qurý qajet. Oǵan barlyq memlekettik, atqarýshy organdar men kvazimemlekettik korporatsiialar jáne holdingterdiń, demeýshilik tanytatyn kásipkerlerdiń múmkindikterin jumyldyrýdyń mańyzy zor», – dedi Áli Bektaev.
Depýtat saýalynyń sońynda árbir qazaqstandyq ómirlik sapanyń eń joǵary standarttaryna laiyq ekenin atap ótti.
