1 naýryzdan bastap Qazaqstan koronavirýstyń taralýyna bailanysty Iranǵa ushatyn reisterdi toqtatady, Ońtústik Koreiaǵa ushatyn reister sanyn qysqartady dep habarlady bas sanitarlyq dáriger Jandarbek Bekshin 26 aqpanda Nur-Sultandaǵy brifing kezinde.
Onyń aitýynsha, qazir Ońtústik Koreiaǵa aptasyna toǵyz reis ushsa, 1 naýryzdan keiin olardyń sany úshke deiin qysqarady. "1 naýryzǵa deiin azamattarymyzdyń úige qaitýyna múmkindik jasaimyz" dedi Jandarbek Bekshin.
"Irandaǵy jaǵdai sál jeńildeý. Onda 170 azamatymyz bar. Olar 1 naýryzǵa deiin elge qaitýy tiis. Kóptegen elder Iranmen áýe bailanysyn toqtatty. Mysaly, Túrkiia, Pákistan, Aýǵanstan, Oman" dedi Bekshin.
Bekshinniń aitýynsha, syrtqy ister ministrligi jáne indýstriia jáne infraqurylymdyq damý ministrligi koronavirýstyń jyldam taralýyna bailanysty ózge eldermen de áýe bailanysyn shekteý máselesin qarap jatyr.
Nur-Sultan 29 qańtardan bastap Qytaimen avtobýs qatynastaryn shektegen. 1 aqpannan bastap Qazaqstan men Qytai arasynda poiyz, 3 aqpanda áýe reisteri toqtady. Nur-Sultan Qytai azamattaryna viza berýdi de ýaqytsha doǵardy. Qytaimen shekaradaǵy "Qorǵas" shekaralyq yntymaqtastyq ortalyǵy qańtar aiynyń sońynan beri jabyq.
Qazir álemde koronavirýsqa shaldyqqandar sany 80,5 myń adamǵa jetti. Al koronavirýstan qaitys bolǵandar sany 2,7 myń adamnan asqan. Virýs alǵash tabylǵan Qytaidan bólek, koronavirýs juqtyrý faktileri Ońtústik Koreia, Italiia, Japoniia men Iranda kóp kezdesken. Resmi derek boiynsha, Qazaqstanda koronavirýs tirkelmegen.
