Bilim salasyna shetel tájiribesin engizýde asyǵystyq tanytpaý kerek. Bul týraly Senat tóraǵasynyń orynbasary Bektas Beknazarov málim etti, dep habarlaidy "Ult aqparat".
«Búgingi talqylaý barysynda shetel tájiribesi degenge kóbirek kóńil bólip otyrmyz. Shetel tájiribesinde barlyǵy durys dep kim kepildik berip aita alady?! Ár memlekettiń óziniń tiisti qurylymy, zańy, dili men ereksheligi, talaptary bar. Sondyqtan shetel tájiribesi degen máselege toqtalsaq, ol qanshalyqty bizdiń memlekettiń múddesine sáikes keledi? Osyǵan nazar aýdarýymyz kerek. Mysaly, Japoniiada 12 jasqa deiingi balany mektepte tek qana japon tilinde oqytady. Sonyń arqasynda japon tili óz deńgeiin joǵaltpai, barlyq jerde keńinen paidalanylýda», - dedi B. Beknazarov Senattyń jalpy otyrysynda.
Bul turǵyda ol shetel tájiribesin usynar aldynda osy jańashyldyqtar memleketimizdiń múddesine qanshalyqty sai keletinin tyńǵylyqty pysyqtaý kerektigin atap ótti.
«Ashat Qanatuly, ózińiz basshylyq jasaityn bilim jáne ǵylym salasyndaǵy reformalardyń sanyn ǵana emes, sapasyn arttyrý kerek. Kez kelgen reformanyń tiimdiligine basa nazar aýdarý qajet. Ol qanshalyqty qajet? Keltiretin ziiandy tustary joq pa? Paidaly ári utymdy baǵyttary qandai? Atap aitqanda, osy suraqtarǵa naqty jaýaptar bolýy tiis. Qandai da bir reformany iske asyrmas buryn, aldyn ala jáne jan-jaqty zerdeleý jumystaryn júrgizip, ony qoǵamdyq talqyǵa salý kerek. Bilim salasynyń jaǵdaiyna qazir qoǵam qandai baǵa berip jatqanyn bárimiz jaqsy bilemiz. Qoǵam úshin óskeleń urpaqty tárbieleýde, iaǵni osyndai mańyzdy máselelerde asyǵystyq jasaýǵa bolmaidy», - dedi Bektas Beknazarov Bilim jáne ǵylym ministri Ashat Aimaǵambetovke qarata aitqan sózinde.
