Májilis depýtaty, QR ulttyq sport qaýymdastyǵynyń prezidenti Bekbolat Tileýhan kókpar daýynan keiin óz ornyna jurt usynǵan sportshyny qanshalyqty laiyq kóretinin aitty. Sondai-aq, ol jeke ómirinde qandai ózgerister bolǵanyn Sputnik tilshisine bergen suhbatynda áńgimeledi.
- Ornyńyzǵa qazaqstandyq boksshy Muhtarhan Dildábekovti usynǵan eken. Ol kisi sizdi almastyrýǵa laiyq pa?
— Muhtarhan Dildábekov olimpiada chempiony ári kúmis júlde iegeri. Bul orynǵa ábden laiyq dep oilaimyn. Biraq basqarý júiesi degen ońai nárse emes. Ázirge onyń bul júiede qanshalyqty tájiribeli ekenin bilmeimin. Iaǵni Muhtarhandy jaqsy azamat, keremet sportshy retinde tanysam da, onyń qanshalyqty basqara alatynyn bilmeidi ekenmin. Biraq, halyq laiyq dep tapsa, rasymen de, bul orynǵa laiyq bolǵany.
- Kókpar tóńiregindegi daý týraly pikir bildirgende Talas Begalinov te, Erlen Ospanov myrza da munyń astarynda saiasat jatqanyn aityp qaldy. Olardyń sóz qylyp otyrǵany qandai saiasat?
— Bul eki azamattyń qandai saiasat týraly aityp jatqanyn men de bilmeimin. Bir kezderi Atambaevtyń da, bizdiń ministrdiń sózin saiasatqa balap jatty. Sóz qýǵan daýǵa, jol qýǵan qazynaǵa jolyǵady demekshi, osyndai nárseni qazbalaǵym kelmeidi.
Meili meniki qate dese, qate bolsyn. Jaman dese, men-aq jaman bolaiyn. Biraq bir-eki adamǵa jaýap beremin dep turyp eki eldiń ortasyna syn túsip qalsa jaramas. Qazir sizge bir nárse aitsam, ol Bekbolat Tileýhannyń emes, qazaqtyń pikiri bolyp ketedi.
Kesirim elge tiiýi múmkin. Sol sebepti Erlen men Bekbolat jaman bolsa, bola bersin.
- Bir kún buryn telefon arqyly shaqyrtý aldym degen qazaq kókparshy týraly ne deisiz? Olar, rasymen, jattyqpaǵan ba?
— Bul jalǵan. (Telefon arqyly shaqyrtylǵan sportshy týraly — avt.) Kókparshylarymyzdyń barlyǵy turaqty túrde jattyqqan, daiyndalǵan jigitter. Qyrǵyz telearnalary kerek sózderin alyp, montajdap bergendikten, osyndai jaǵdai bolyp otyr dep oilaimyn. Halyq muny durys túsinbei jatyr. Sondai-aq, osy jattyǵýǵa ministrlikten qarjy bólinedi. Attaryn da baptaidy. Bizdiń maqtanyp otyrǵanymyz osy ǵoi. Tek qoǵamdaǵy qyzyǵýshylyq qyrǵyz aǵaiyndardyń deńgeiinde emes.
- Sońǵy kezde shyǵarmashylyqqa kóp nazar aýdarmai júrgen sekildisiz. Bul ýaqyt tapshylyǵynan ba?
— Ótkende kontsert berip, halqym kelip kórdi. Aimaqtarǵa barǵan kezde de qanshama kontsert berip jatyrmyn. Babym jetispei qalatyn kezder de bolady. Árine, tolyq kontsert berý qiyn, biraq dombyradan qol úzgen jerim joq.
- Shoý-biznes ókilderi arasynda toqal alý kóbeiip keledi. Al sizdiń toqal alýǵa kózqarasyńyz qandai?
— Menińshe, toqal degen birtúrli kemsitip aitylǵan siiaqty. Ekinshi, úshinshi jar dep aityńyz. Qazaqta toqal degen sózdiń reńki jaman. Ádette toqal dep múiizi joq siyrdy aitady. Toqal degen sóz qulaqqa túrpidei tiedi.
- Ózińizdiń qansha jaryńyz bar?
— Qudai bergen kóp jarym bar. Siz aitqandai, beseýge jetpeidi. Odan az. Munymen qatar, myna máseleni aitqym kelip tur. Jurt jaqynda "Bekbolat óziniń 11 balasy bar ekenin moiyndady" dep shýlady. Osy tusta Bekbolatqa taǵy da jala jabyldy. Mende 11 emes, 14 bala bar.
- Suhbatyńyzǵa rahmet!
