Bekbolat Tileýhan Qyrǵyzstan arnalaryna suhbat berip, óz elinde kókparǵa esh daiyndyq júrgizilmeitinin jáne kókparǵa óz atyn qosqanyn aitqan qazaqstandyq sportshyǵa qatysty pikir bildirdi, dep habarlady Sputnik tilshisi.
Depýtattyń aitýynsha, kókparshynyń bul sózderi shyndyqqa janaspaidy. Sebebi, kókpardyń atyn uiymdastyrýshy tarap daiyndap qoiady.
"Bul dálelsiz aitylǵan dúnie. Aitsa qaiteiin?! Bir emes, eki emes, birneshe ret jiyn ótkizdi. Atpen shaqyrǵan jaqqa barasyń. Biraq Frantsiiadan, Amerikadan kim at alyp keledi? Ádette kim shaqyrsa, sol at daiyndap qoiady. Ekinshiden, biz báribir Qyrǵyzstan sekildi at daiyndai almaimyz.
Osyndaida ekonomikalyq shoktyń bir paidasy bar. Keibir adam kúni osy atqa qarap qalǵandyqtan, ony baptap, satýmen ainalysady. Keiin ózderi de keremet atbegiler bolyp shyǵady. Muny qyrǵyzdarǵa qatysty aityp jatyrmyn. Qazaq — seri ári atqa qumar halyq. Dese de, kelesi sózderim bizdiń jigitterdiń kóńiline azdap keletin siiaqty. Aiyp etpeńizder! Biraq qyrǵyz sekildi at daiyndai almaisyzdar. Saryshaian da qyrǵyzdardan kelgen. Jaqsy attardy aityp jatyrmyn. Sondyqtan qyrǵyzdyń at daiyndaýy qai jaǵynan bolsyn tómen dep aita almaimyz", — dedi depýtat.
Ári qarai ol jalǵan aqparatpen jurtty shýlatyp ózin tanytqysy keletinderge toqtaldy. Sondai-aq, elimizde kókparshylardyń daiyndyǵy qalai ótetinin aityp berdi.
"Ortaq dúniege janashyrlyq tanytýdan góri, árkim óziniń kásibin dóńgeletip qalǵysy keletin kezder bolady. Sensatsiia jasaǵysy kelip turady. Bálkim bul da kásibi erekshelik shyǵar. Jańaǵy sózderdi sensatsiia úshin jalaýlatyp aita salǵan shyǵar. Bizde kókparǵa daiyndyqsyz bara salý degen dúnie bolmaidy. Oqý-jattyǵýlar turaqty túrde júrgiziledi. Osy máseleni júiege qoia alatyn elderdiń birimiz. Ásirese, jastar men jasóspirimder arasynda.
Maǵan senesiz be? Kósheden ustap ákelgen bireýge senesiz be?
Onyń ústine Qazaqstanda 300-den astam kókparshy bar. Kez kelgenin alyp aita berýge bolady", — dedi QR ulttyq sport federatsiiasynyń prezidenti.
Budan ózge Bekbolat Tileýhan nelikten dál bulai aqtalyp jatqanyn túsindirdi. Sondai-aq, bul jaǵdaidyń mundai deńgeige kóterilýine esh sebep joq ekenin aityp ótti.
"Jalpy ózin kináli sezingen adam ǵana aqtalady dep jatady. Biraq bul jerde men tek saýaldarǵa jaýap berip jatyrmyn. Munymen qatar, Djakartada boksshylarymyz ben dziýdoshylarymyz utyldy. Boks derjavasy Aziia aldynda masqaraǵa ushyrady. Qansha aqsha bólingenin bilgende jurt basyn ustady. Biraq, qaiǵyryp, qusa bolyp qulaǵan joq. Al kókparda biz júldeli orynǵa ie bolyp jatyrmyz. Budan tragediia jasýdyń ne keregi bar. Men sony túsinbeimin", — dep qorytty májilismen.
