Qoǵam alańdaýshylyǵyn týdyrǵan qylmys úshin jazany barynsha kúsheitý úshin qandai shara qoldanylady? Búgin Májilistiń otyrysynda depýtat Bekbolat Tileýhan Ishki ister ministrine osyndai depýtattyq saýal joldady, dep habarlaidy BNews.kz tilshisi.
«Ótken aptada Almaty oblysy Jambyl aýdanynda bolǵan jan túrshigerlik oqiǵa, qanquily qylmys búkil eldiń qabyrǵasyn qaiystyryp otyr. Adal eńbegimen bala-shaǵasyn asyrap júrgen esil azamattardyń aidyń kúnniń amanynda qaraqshylardyń qolynan aiýandyqpen qaza tabýy janymyzdy jabyrqatyp otyr. Keshe ǵana jer qoinyna tapsyrylǵan qyrshyndardyń otbasylarynyń qaiǵysyna ortaqtasyp, kóńil aitamyz. 8 balany jetim qaldyryp, kóz jasyna qalǵan qaraqshylardyń ádil jazasyn alýyn Parlament Májilisindegi «Nur Otan» fraktsiiasy aiyryqsha nazarynda ustaidy dep sendirgimiz, jubatqymyz keledi", - dedi B.Tileýhan.
Onyń aitýynsha, bul bir otbasynyń ǵana emes, búkil qoǵamnyń júregine túsip otyrǵan aýyr salmaq.
«Ata kásibi mal sharýashylyǵy bolǵan elde mal urlyǵyna ústirt qarap, politsiia tarapynan qajetti nazardyń kemshindigi de jasyryn emes. Jalpy, sońǵy kezderi qarap otyrsaq, beibit eldiń berekesin alǵan ekstremizm men terrorizm, nárestesin laqtyrǵan ana, «ana» deýge kelse eger, adamdyqtan bezgen pedofiliia siiaqty qylmystar qoǵamda órship bara jatyr. Osy oraida Ishki ister ministrligi osy ispettes qylmystardyń aldyn alý jáne boldyrmaý maqsatynda qandai jumystar atqarmaq? Osyndai qoǵamnyń alańdatýshylyǵyn týdyryp otyrǵan qylmystardy erekshe sanattaǵy qylmystar dep baǵalap, olarǵa beriletin jazany barynsha kúsheitý úshin qandai shara qoldanylmaq?», - degen saýalyn joldady depýtat.
