Almatyda apatqa ushyraǵan Bek Air ushaǵynyń ekinshi ushqyshynyń jaǵdaiy belgili boldy, dep habarlaidy "Ult aqparat".
54 jastaǵy Mirjan Mýldahýnov № 4 aýrýhanaǵa jetkizildi.
Ushqysh jabyq mi jaraqatymen tústi. Miy shaiqalǵan, sol jaq beti men shúide tusy jyrtylǵan. Keýde tusy aýyr soqqy alǵan.
Al áýe kemesiniń komandiri 57 jastaǵy Marat Muratbaev oqiǵa ornynda qaza boldy.
«Tańnan beri jedel járdem bizdiń aýrýhanaǵa 19 adam jetkizdi. Olardyń 11-iniń jaǵdaiy óte aýyr bolǵandyqtan, jansaqtaý bólimine jatqyzyldy. Qazirgi tańda 6 patsientke shuǵyl ota jasaldy. 8 adam áli jansaqtaý bóliminde jatyr. 2 adam, ókinishke orai, qaitys boldy. Basqalarynyń ómiri úshin kúresip jatyrmyz», - dedi № 4 qalalyq klinikalyq aýrýhananyń bas dárigeriniń mindetin atqarýshy Aiman Baizoldanova.
Onyń aitýynsha, emhanada shtab quryldy. Patsientterdiń týystarymen psihologtar jumys istep jatyr.
Aita keteiik, búgin tańda Almatydan Nur-Sultan qalasyna ushyp shyqqan ushaq radardan joǵalyp ketti.
Keiin 95 jolaýshysy jáne 5 ekipaj múshesi bar ushaqtyń apatqa ushyraǵany málim boldy. Oqiǵanyń mán-jaiyn anyqtaý úshin ushaq qulaǵan aýmaqqa arnaiy komissiia ushyp shyqty. Osy apatqa qatysty shuǵyl jeli iske qosylǵan.
QR Prezidenti Qasym-Jomart Toqaev ushaq apatyna kináliler zańǵa sáikes qatań jazalanatynyn málimdedi. Elbasy Nur-Sultan Nazarbaev jolaýshylar ushaǵynyń apatqa ushyraýyna bailanysty kóńil aitty.
