Bek Air áýe kompaniiasynyń Ushý qyzmetiniń basshysy Erik Saparov 27 jeltoqsanda Almatyda Fokker 100 ushaǵynyń apatqa ushyraýyna qatysty ishki tekserýdiń nátijelerin jariialady, dep habarlaidy QazAqparat.
Ushý qyzmeti basshysynyń aitýynsha, áýe kemesiniń komandiri ushaq pen jolaýshylardy aman alyp qalý úshin sońyna deiin áreket jasaǵan.
«Jel - 140, tynysh, 1000 metrden bári kórinedi, erekshe qubylystar baiqalmaidy. Onda nelikten ushaq teńselip, bir qanatynan ekinshi qanatyna aýysyp, aýytqidy, buǵan alǵan jyldamdyq sebep pe? Biz aldymyzda qandai ushaq ushqany týraly derekterdi aldyq. Belgili bolǵandai, aldymyzda 90 tonnaǵa deiin júk kótere alatyn Máskeýge baǵyt alǵan Air Astana áýe kompaniiasyna tiesili Airbus 321 Neo ushaǵy ushqan. Endi ushý ýaqytyna nazar aýdaryńyzdar: 01:19 sekýnd UTC, iaǵni Almaty ýaqyty boiynsha - 7:19. Onyń jyldamdyǵy - 184 túiin. Bizdiń Fokker 100 saǵat 01:20 sekýndta, jyldamdyǵy 155 túiinmen ushty. Iaǵni, arasy - 1 minýt, Fokker 100 kókke kóterilgende aldyńǵy ushaqtyń aýada qaldyrǵan iirim izine baryp shatasty», - dedi ol.
Onyń málimetinshe, ushaqtyń apatqa ushyraýyna aldynda ushqan ushaqtyń tútini áser etken bolýy da múmkin. Eki ushaqtyń arasynda ushý ýaqytynyń aralyǵy kem degende 2 minýt bolýy tiis.
Brifing barysynda «Bek Air» kompaniiasynyń basshysy Nurlan Jumasultanov kompaniia atynan apatta qaza bolǵandardyń otbasylaryna kóńil aitty.
