Beeline Qazaqstan uialy telefon operatory reseilik 15 telearnany kórsetpeý týraly sheshiminen bas tartty. Bul týraly Resei tsifrlyq damý ministrligi telegramm-kanalynda habarlady.
"Veon (Beeline Qazaqstan iesi) kompaniiasymen keńesten soń, olar tsifrlyq damý ministrligine josparlaryn ózgertip, reseilik telearnalardy óshirmeitinin aitty" dep málimdedi Resei tsifrlik damý ministrligi.
27 qyrkúiekte Beeline Qazaqstan málimdeme taratyp, "5 qazannan bastap TV+Úidegi internet" paketinen jáne BeeTV servisinen reseilik 15 telearnany (ishinde kremlshil "Rossiia 24", "NTV MIR" jáne Pervyi kanal bar) óshiretinin málimdegen. Al 28 qyrkúiekte kompaniia reseilik telearnalarmen qatar batystyń telearnalar da óshiriletinin jariialaǵan.
Resei Ýkrainaǵa basyp kirgen soń Qazaqstanǵa kremlshil telearnalardyń yqpaly jaily kóp aityla bastaǵan.
Sáýirde qoǵamdyq pikirge monitoring jasaityn Demoscope biýrosy áleýmettik saýalnama júrgizip, qazaqstandyqtardyń edáýir bóligine Resei propagandasy áser etip jatyr dep málimdegen. Zertteý avtorlary qazaqstandyqtar Aqorda men jergilikti basylymdardyń málimdemesinen góri Resei basylymynyń agressivti aqparatyn qabyldaidy degen edi.
Aqpanda Resei Ýkrainaǵa basyp kirgende, Qaraǵandy oblysyndaǵy "Remstroiservis" kompaniiasy soǵysqa narazylyq retinde Resei telearnalaryn óshirip tastaǵan. Internet pen televideniia qyzmetin usynatyn kompaniia "soǵysqa jáne soǵys propagandasyna qarsymyz" dep málimdegen. Biraq kompaniia sol kúni reseilik telearnalardy qaita qosqan.
