Elimizdegi keibir bazar basshylary saýdagerlerge óz talaptaryn qoiyp, baǵany da ózderi belgileitini anyqtaldy. Bul týraly QR Saýda jáne integratsiia ministrligi saýda komiteti tóraǵasynyń orynbasary Aidar Ábildabekov málim etti, dep habarlaidy QazAqparat.
«El aýmaǵyndaǵy 114 saýda bazarynyń qyzmetine tekserý júrdi. Nátijesinde birqatar zańbuzýshylyq anyqtaldy, onyń ishinde salyq zańnamasynyń buzylýy da bar. Saýda salasyndaǵy taǵy bir problema - kassa apparatynyń bolmaýy jáne sanitarlyq talaptardyń tiisti deńgeide saqtalmaýy. Bazarlar qyzmetin tekserýdiń nátijesi saýda salasyna qatysty zańnamaǵa ózgeris engizý talap etiletinin kórsetti. Bul shara elimiz boiynsha saýda salasyn bir tártipke keltirý maqsatynda júrgizilmek. Sonymen qatar, bazar ielerine jeke jaýapkershilik júktemekpiz. Sebebi, kóp jaǵdaida bazar ieleri: «Men saýda ornyn jalǵa berýshimin, baǵaǵa qatysym joq», - deidi. Mine, osy oraida jaýapkershilik kerek», - dedi Aidar Ábildabekov ortalyq kommýnikatsiialar qyzmeti alańynda ótken baspasóz máslihatynda.
Onyń aitýynsha, áleýmettik mańyzy bar taýarlardyń baǵa turaqtylyǵyn saqtaý jolynda 2022-2024 jyldarǵa 67 is-shara qarastyrylǵan. Sonyń ishinde azyq-túlik qaýipsizdigin qamtamasyz etýge arnalǵan 31 shara bar.
«Ótken aptada óńirlik ákimdikter azyq-túlik baǵasyn qoldan ósirgen 231 faktini anyqtady. Keibir saýda oryndarynda áleýmettik mańyzy bar taýarlardyń baǵasy 40 paiyzǵa deiin qymbattap jatady. Túsindirý jumystarynan soń keibir saýda núkteleri baǵany birden túsiredi. Jalpy, azyq-túlik baǵasyn ósirmei, turaqtylyqty saqtaý úshin Úkimet bekitken birqatar shara atqarylyp jatyr», - deidi Aidar Ábildabekov.
