QR Ulttyq banki paiyzdyq dálizdi +/- 1 p.t. deńgeide qaldyra otyryp, bazalyq mólsherlemeni jyldyq 9,25% deńgeide saqtaý týraly sheshim qabyldady, dep habarlaidy "Ult aqparat" QR UB baspasóz qyzmetine silteme jasap.
«Qyrkúiekte 5,3% bolǵan is júzindegi jyldyq infliatsiia serpini Ulttyq banktiń aldyńǵy boljam qorytyndysy boiynsha jasalǵan baǵalaýyna sáikes qalyptasýda. Halyqtyń infliatsiialyq kútýleri is júzindegi infliatsiia deńgeiine jaqyn qalyptasýda. 2019 jyldyń sońynda infliatsiia 5,7-5,8% deńgeide, iaǵni 4-6% nysanaly dáliz ishinde kútiledi. Retteletin qyzmetterge jáne azyq-túlik taýarlarynyń jekelegen túrlerine baǵa serpinine bailanysty infliatsiialyq táýekelderdiń bolýyna qaramastan, infliatsiia 2020 jyldyń sońyna deiin aralyqta 4-6% nysanaly dáliz ishinde saqtalady», delingen habarlamada.
Bazalyq mólsherleme boiynsha keiingi sheshimderdi Ulttyq bank nysanaly baǵdarǵa qol jetkizý maqsatynda qalyptasyp otyrǵan jáne boljanatyn infliatsiia serpinin eskere otyryp qabyldaidy.
«Jyldyq infliatsiia 2019 jylǵy qyrkúiekte aldyńǵy aimen salystyrǵanda tamyzdaǵy 5,5%-dan 5,3%-ǵa deiin baiaýlady. Kókónis pen jemiske, retteletin qyzmetter men energiia resýrstaryna baǵanyń ósýin eskermei esepteletin bazalyq infliatsiia da 7,9%-dan 7,7%-ǵa deiin tómendedi.
Azyq-túlikke jatpaityn taýarlarǵa jyldyq kórsetýde 5,4%-ǵa jáne aqyly qyzmetterge 0,7%-ǵa baǵanyń ósý qarqyndarynyń baiaýlaýy infliatsiiaǵa tejeýshi áser kórsetýin jalǵastyrýda. Azyq-túlikke jatpaityn infliatsiia serpini kiim-keshek pen aiaq-kiimge, dizel otynyna baǵa ósýiniń maýsymdyq jyldamdaýynyń bolmaýymen sipattalady. Benzin jáne qatty otyn baǵasy tómendeýin jalǵastyrýda (jyldyq kórsetýde tiisinshe 4,8%-ǵa jáne 3,5%-ǵa). Retteletin qyzmetter sońǵy 12 aida 8,2%-ǵa arzandady», delingen Ulttyq bank taratqan habarlamada.
Halyqtyń infliatsiialyq kútýleri aǵymdaǵy jylǵy qyrkúiekte tamyzben salystyrǵanda aitarlyqtai ózgergen joq jáne aldaǵy 12 aida 5,4% bolyp baǵalanady.
Taýarlar men qyzmetterge tutynýshylyq suranys keńeiýde. Halyqtyń naqty aqshalai kiristeriniń ósýi 2019 jylǵy qańtar-tamyzda 6,7% boldy. Bul úrdisterge áleýmettik qoldaýǵa, jalaqyǵa biýdjettik shyǵystar jáne qyrkúiekte ósýi jyldyq kórsetýde 22,6% bolǵan tutynýshylyq kreditteýdiń keńeiýi yqpal etýde.
Ulttyq banktiń málimdeýinshe, infliatsiia 2019 jyldyń qorytyndysy boiynsha 5,7-5,8% deńgeide baǵalanyp otyr. 2020 jyl ishinde infliatsiianyń 4-6% nysanaly dálizdiń ortasy deńgeiine deiin baiaýlaýy kútiledi. Buǵan aǵymdaǵy aqsha-kredit jaǵdailary yqpal etetin bolady. Infliatsiia faktorlarynyń ár túrli baǵytta bolýy onyń qysqa merzimdi kezeńdegi qubylmalylyǵy táýekelderin arttyrady. Negizgi táýekelder retteletin qyzmetterdiń jekelegen túrlerine shekti tarifterdiń kútiletin ósýine bailanysty.
Aita keterligi, bazalyq mólsherleme boiynsha kezekti sheshim 2019 jylǵy 9 jeltoqsanda Nur-Sultan qalasynyń ýaqytymen saǵat 15:00-de jariia etiledi.
Eske sala ketsek, 9 qyrkúiekte Qazaqstan Respýblikasynyń Ulttyq banki bazalyq mólsherlemeni 9,25 paiyzǵa deiin kóterý týraly sheshim qabyldaǵan bolatyn.
