kollaj: Tengrinews.kz
Qorǵanys ministri Rýslan Jaqsylyqov Baizaqtaǵy jarylysta iz-túzsiz joǵalǵan áskeri qyzmetshi týraly pikir bildirdi, dep habarlaidy QazAqparat.
«Men onyń ata-anasymen kezdestim. Qys mezgilinde aýa-raiynyń qolaisyzdyǵyna bailanysty izdeýdi ýaqytsha toqtattyq. Biz qazir ýtilizatsiia jumystaryn bastadyq. Sáikesinshe osy áskeri qyzmetshiniń súiegin dep aitqym kelmeidi, jalpy izdestirý jumystary jalǵasýda. Ol tipti jarylystyń epitsentrinde bolsa da, eshteńe qalmaýy múmkin emes qoi. Qandai da bir nátije shyqsa, habarlaimyz», - dedi ministr Májilis otyrysynan keiin tilshilerge bergen suhbatynda.
Ministr qazir ýaqyt pen merzim týraly aitý qiyn ekenin jetkizdi.
«Sebebi onda áli de kóp jumys júrgizý kerek. Onyń otbasyn da túsinemin. Biz olarǵa habar-osharsyz mert boldy dep tanýdy usyndyq, sonda áleýmettik tólemder de, Qarýly Kúshter tarapynan tólemder bolar edi. Biraq otbasyn da jaqsy túsinemiz jáne izdeýdi jalǵastyramyz. Izdeý jumystaryn bizben qatar ishki ister organdary da júrgizip jatyr», - dedi Jaqsylyqov.
Eske sala keteiik, ótken jyldyń 26 tamyzynda Jambyl oblysynyń Baizaq aýdanynda oq-dári qoimasynan órt shyǵyp, artynan jarylǵany habarlanǵan bolatyn.
Oqiǵa saldarynan barlyǵy 17 adam qaza tapty. Olardyń arasynda ishki ister organynyń qyzmetkerleri, áskeriler men tótenshe jaǵdailar qyzmetiniń ókilderi, áskeri prokýror bar. Sondai-aq áskeri qyzmetshi Baýyrjan Dáýitbaev joǵalyp, onyń izdestirilip jatqany belgili boldy.
