Elbasy Nursultan Ábishuly Nazarbaev halqymyzǵa arnaǵan «Bolashaqqa baǵdar: rýhani jańǵyrý» baǵdarlamalyq maqalasynda: «Adam balasy – sheksiz zerdeniń ǵana emes, ǵajaiyp sezimniń iesi. Týǵan jer árkimniń shyr etip jerge túsken, baýyrynda eńbektep, qaz basqan qasietti mekeni, talai jannyń ómir-baqi turatyn ólkesi. Ony qaida júrse de, júreginiń túbinde áldilep ótpeitin jan balasy bolmaidy. Týǵan jerge, onyń mádenieti men salt-dástúrlerine aiyryqsha ińkárlikpen atsalysý – shynaiy patriotizmniń mańyzdy kórinisteriniń biri», - dep atap ótken bolatyn.
Qazaq «Týǵan jerge týyńdy tik» dep beker aitpaǵan. Patriotizm – kindik qanyń tamǵan jerińe, ósken aýylyńa, qalań men óńirińe degen súiispenshilikten bastaý alady.
Elbasymyzdyń «Týǵan jerge taǵzym!» bastamasy igi isterdiń jarshysy bolyp otyr. Arys qalasyna qarasty Baitoǵai eldi mekeninde jurtshylyq kútken sport kesheni ashyldy. 200-ge jýyq tútini bar aýyl balalary endi Nurtai Bijanuly atyndaǵy stadionǵa baryp, fýtboldyń qyr-syryn meńgeredi.
Týǵan jerge taǵzym jasaǵandardyń biri - Hadisha Bijan. Óz isin urshyqsha iirgen kásipker elden jyraqta júrse de, ósken jerin umytqan emes. Aýyl balalarynyń shymyr da shapshań bolyp ósýin qalap, tamasha tartý jasady. Zaman talabyna sai sport keshenin salyp berdi.
Osyndai igilikti iske qýanǵan aýyl turǵyndary záýlim sport kesheniniń ashylý saltanatyna taily-tuiaǵymen túgel jinaldy. Sport kesheniniń lentasyn Arys qalasynyń ákimi Murat Qadyrbek pen oblystyq máslihat depýtaty Rabiǵa Qýatbekova arnaiy qidy.
Bul sport kesheninde fýtbolshylar úshin barlyq jaǵdai jasalǵan. Jasyl alań, arnaiy kiim sheshetin bólmeler, bári de zaman talabyna sai. Oiynǵa qajetti qural-jabdyqtardan da muqtajdyq joq. Kez-kelgen ýaqytta dop tebýge bolady. Óz perzentiniń sportpen ainalysýyna tamasha múmkindik jasaǵany úshin aýyl turǵyndarynyń kásipkerge aitar alǵysy ushan-teńiz.
Búgin esigin ashqan sport kesheni aýyl turǵyndaryn salaýatty ómir saltyn ustanýǵa úndeitin, jastardy buqaralyq sportqa tartatyn tárbie oshaǵy bolatynyna kúmán joq.
Sport kesheniniń ashylý saltanatynda fýtboldan týrnir uiymdastyryldy. Almatydan, sonymen qatar, jergilikti jerden 12 komanda qatysyp, ózara myqtyny anyqtady. Jeńis tuǵyrynan kóringen sportshylarǵa arnaiy syi-siiapat tabys etildi.
Núrken Kúzerbaev
