QR Premer-Ministri Asqar Maminniń tóraǵalyǵymen ótken «Báiterek» ulttyq basqarýshy holdingi» AQ Direktorlar keńesiniń otyrysynda holding Jarǵysyna engizilgen ózgerister, sondai-aq 2020 jylǵa arnalǵan investitsiialyq saiasat qaraldy, dep jazady primeminister.kz.
Memleket basshysynyń 2020 jylǵy 1 qyrkúiektegi Qazaqstan halqyna arnaǵan Joldaýyn iske asyrý aiasynda oǵan «QazAgro» UBH» AQ-ny qosý jolymen «Báiterek» UBH» AQ-ny qaita uiymdastyrý jumystary júrgizildi. Osyǵan bailanysty «Báiterek» holdinginiń Jarǵysynda kompaniia qyzmetiniń negizgi maqsattary men máni elimizdiń agroónerkásiptik keshenin damytýdy yntalandyrý jónindegi memlekettik saiasatty iske asyrýmen tolyqtyryldy.
Otyrysqa qatysýshylar holdingtiń obligatsiialaryn shyǵarý arqyly 10 jylda 50 mlrd teńge kóleminde qosymsha qarjy tartý týraly sheshim qabyldady. Alynǵan qarajat el kásiporyndarynyń negizgi quraldaryn lizingtik qarjylandyrý úshin «Ónerkásipti damytý qory» AQ-ǵa jiberiletin bolady.
2020 jyly «Báiterek» holdinginiń enshiles uiymdary jalpy somasy 1 trln 16,9 mlrd teńgege ekonomikanyń shikizattyq emes salalarynyń kásiporyndaryna qoldaý kórsetti. Ótken jylmen salystyrǵanda qarjylyq qoldaý kólemi 177,7 mlrd teńgege nemese 21%-ǵa ulǵaidy.
Ekonomikanyń jeke sektoryn damytý maqsatynda 2020 jyly 799,8 mlrd teńge somasyna 20 myńnan astam kásipkerlik sýbektilerine qoldaý kórsetildi. Sondai-aq otyrysta 2019-2020 jyldarǵa arnalǵan Korporativtik basqarýdy jetildirý jónindegi is-sharalar josparyn oryndaý nátijeleri, korporativtik basqarýdy táýelsiz baǵalaý nátijeleri qaraldy.
«Báiterek» UBH» AQ-nyń 2020 jylǵy tórtinshi toqsandaǵy táýekelderi jónindegi esebi jáne Ishki aýdit qyzmetiniń sáikes kezeńdegi esebi bekitildi.
