«Báiterek» UBH» AQ Basqarma tóraǵasynyń orynbasary Rústem Qaraǵoishin holding shaǵyn jáne orta bizneske qandai qoldaý kórsetip jatqandyǵyn aitty, dep habarlaidy QazAqparat.
«Qazaqstan biznesi úshin qazirgi kezeń – óte qiyn bolyp tur. Koronavirýs indetine bailanysty májbúrli shekteý sharalarynan biznes turalap, shyǵynǵa ushyrap otyr. Mundai jaǵdaida «Báiterek» holdingi shaǵyn jáne orta biznesti qoldaýǵa basymdyq beredi. Shaǵyn jáne orta kásipkerlerge memlekettik baǵdarlamalar aiasynda da, ózimizdiń baǵdarlamalarymyz aiasynda da kóptegen qoljetimdi quraldardy usynamyz. Bul qoldaý quraldarynyń kóbi «Biznestiń jol kartasy» memlekettik baǵdarlamasyna shoǵyrlanǵan. «Biznestiń jol kartasy» Tuńǵysh Prezident – Elbasy Nursultan Ábishuly Nazarbaevtyń tapsyrmasy boiynsha 2010 jyldan bastap júzege asyrylyp keledi. Baǵdarlama tiimdiligin dáleldep, qazaqstandyq kásipkerlerdiń naǵyz kómekshisi ekenin tanytty. 2013 jyldan beri «Damý» qory bul baǵdarlamany «Báiterek» holdingi quramynda júzege asyrýda«, - dedi ol Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, shaǵyn jáne orta biznesti qoldaý quraldarynyń ishinde syiaqy mólsherlemesin sýbsidiialaý quraly suranysqa ie bolyp otyr.
«2020 jylǵy 1 tamyzdaǵy jaǵdai boiynsha «Damý» qory 2010 jyldan beri baǵdarlamanyń úsh baǵyty boiynsha 2,8 trillion teńge somasyna 16 311 jobany sýbsidiialady. Onyń ishinde 2018 jyly jalpy kredit somasy 173 milliard teńgege 1 432 joba, al 2019 jyly jalpy kredit somasy 154 milliard teńgege 2 402 joba qoldaý tapty», - dedi ol.
Basqarma tóraǵasynyń málimetinshe, sýbsidiialanatyn jobalardyń salalyq qurylymynda óńdeý ónerkásibi, kólik jáne qoimalaý jobalary basym. Kóterme jáne bólshek saýdadaǵy 286 milliard teńgelik 2 293 joba, 144 milliard teńgelik 1 220 aýyl sharýashylyǵy jobasy bar.
«Óńirler arasynda Pavlodar (jalpy kredit somasy 190 milliard teńgelik 1 304 joba) jáne Shyǵys Qazaqstan (jalpy kredit somasy 179 milliard teńgelik 1 261 joba) oblystary kósh bastap tur. Aqtóbe oblysynda 154 milliard teńgeniń 1212 jobasy osyndai qoldaýǵa ie boldy», - dedi Rústem Qaraǵoishin.
