«Báiterek» holdingi aldynda aldaǵy 5 jylda eldiń jalpy ishki ónimindegi shaǵyn jáne orta biznestiń úlesin 35 paiyzǵa jetkizý mindeti tur. Bul týraly «Báiterek» UBH» AQ Basqarma tóraǵasynyń orynbasary Rústem Qaraǵoishin aitty, dep habarlaidy QazAqparat.
«Shaǵyn biznesti memlekettik qoldaýdyń suranysqa ie taǵy bir sharasy – «Damý» qory beretin kepildik. Kásipker óz biznesin ashýǵa nemese keńeitýge kredit alatyn kezde kepilzaty jetkiliksiz bolǵanda osy kepildikti paidalana alady. 2020 jylǵy 1 tamyzdaǵy jaǵdai boiynsha kredit somasy 306 milliard teńge bolatyn 7 518 joba boiynsha kepildikter berildi. Kepildikter somasy 117 milliard teńgeni qurady. Onyń ishinde 2019 jyly jalpy kredit somasy 74 milliard teńge bolatyn 1 726 jobaǵa qoldaý kórsetildi, kepildik somasy 27 milliard teńgege jetti», - dedi ol Ortalyq kommýnikatsiialar qyzmetindegi baspasóz máslihaty barysynda.
Onyń málimetinshe, sala boiynsha bólgende qarjylandyrylǵan jobalar arasynda óńdeý ónerkásibiniń (jalpy kredit somasy 103 milliard teńge bolatyn 2 206 joba) jáne saýda salasynyń (kredit somasy 32 milliard teńge bolatyn 1 309 joba) úlesi kóp. Óńirler arasynda Aqtóbe (jalpy kredit somasy 20 milliard teńge bolatyn 582 joba) jáne Pavlodar (jalpy kredit somasy 21 milliard teńge bolatyn 535 joba) oblystary kósh bastap tur.
«Baǵdarlamanyń tiimdiligin kórsetetin basqa da sandarǵa da toqtalǵym keledi. Máselen, baǵdarlamaǵa qatysýshy kásipkerler 2010-2019 jyldary 25 trillion teńgeniń ónimin shyǵardy, 1,6 trillion teńge somasynda salyq tóledi. BJK aiasynda memlekettik qoldaýǵa ie bolǵan kásipkerlerdiń arqasynda 100 myńnan astam jańa jumys orny ashyldy. Eger mýltiplikativti áseri týraly aitatyn bolsaq, 1 teńge sýbsidiiaǵa 10 teńge kredit tartyldy. Onǵa bir – bul qarjy institýttary turǵysynan óte jaqsy kórsetkish. 1 teńge kepildikke 2,6 teńgege jýyq kredit qarajaty tartyldy. Sonymen qatar, nátije kórsetip otyrǵandai, 1 teńge sýbsidiia 135 teńge paida jáne biýdjetke 8 teńge salyqtyq túsim ákeledi», - dedi Rústem Qaraǵoishin.
Basqarma tóraǵasynyń aitýynsha, 2020 jyldyń 1 qańtarynan bastap «Biznestiń jol kartasy» taǵy bes jylǵa, iaǵni 2025 jylǵa deiin uzartyldy. Qazir oǵan edáýir ózgerister engizildi. Olar biznestiń qarjylandyrý alýyn sózsiz jeńildetedi.
«Osy tusta aita ketetini, buǵan QR Ulttyq ekonomika ministrliginiń úilesimdi, jedel jáne joǵary deńgeidegi kásibi jumysynyń arqasynda qol jetkizildi. Osylaisha, sýbsidiialaý quraly boiynsha: salalyq shekteýler joiyldy; kásipkerlerge arnalǵan mólsherleme 6 paiyz deńgeiinde birkelkilendi; sýbsidiialanatyn kredit somasy 2,5 milliardtan 7 milliard teńgege deiin ulǵaityldy, al merzimi 5 jylǵa uzartyldy. Kepildik berý quraly boiynsha kásibin jańa bastaǵan kásipkerdiń 360 million teńgege deiingi kreditine kepildik beriledi. Bul rette, kredit somasynyń 85 paiyzy kepildendiriledi. Al kásibin júrgizip jatqan kásipkerdiń 1 milliardqa deiingi kreditine kepildik usynylady. Bul rette, kredit somasynyń 50 paiyzyna kepildik beriledi. 500 million teńgege deiingi ainalym qarajatyn 100 paiyz tolyqtyrýdy kózdeitin kreditterge de kepildik bar. Sondai-aq, salalyq shekteýler joiyldy», - dedi ol.
Rústem Qaraǵoishinniń atap ótýinshe, jańa «BJK-2025» baǵdarlamasyna tamaq ónimderin, sabyn men jýǵysh zattardy, sanitarlyq-gigienalyq maqsattaǵy qaǵaz buiymdaryn óndirý, avtomobil kóligimen júk tasymaldaý, qoima sharýashylyǵy jáne qosalqy kólik qyzmeti, týrizm, jalǵa alý jáne menshikti nemese jalǵa alynǵan jyljymaityn múlikti basqarý syndy salalardaǵy iri biznes sýbektileri engizilgen.
«Bizdiń aldymyzda kásipkerler sanyn arttyrý mindeti tur. Qazir eldiń jalpy ishki ónimindegi shaǵyn jáne orta biznestiń úlesi 30,8 paiyzdy quraidy. Al 2025 jylǵa qarai bul kórsetkish 35 paiyzǵa deiin ósýi tiis. Biz bes jyl ishinde osyndai úlken serpindi kútýdemiz. Sondyqtan kásipkerlerimizdi jeke biznesin ashý nemese damytý úshin memlekettik qoldaýǵa júginýden qoryqpaýǵa shaqyramyn», - dedi Rústem Qaraǵoishin.
