Uialy bailanys operatorlary Tsifrlyq damý, innovatsiialar jáne aeroǵarysh ónerkásibi ministrligine 200 aýylda internet bar ekeni týraly jalǵan aqparat bergen, dep habarlaidy QazAqparat.
«Tsifrlyq Qazaqstan» memlekettik baǵdarlamasyn iske asrydýyń aralyq nátijesin talqylaǵan jiynda vedomstvo basshysy Baǵdat Mýsin osyndai málimet aitty.
«2019 jyly bailanystyń sapasy 50 paiyzǵa tekserilgen bolatyn. Byltyr sol qurammen taǵy 560 tekserý júrgizildi. Uialy bailanys operatorlaryna 2019 jyly 15 mln teńge aiyppul salynsa, 2021 jyly aiyppul kólemi 140 mln teńge boldy. Iaǵni, 10 ese ósken. Onyń ústine biz baqylaý fýnktsiialaryn kúsheittik. Operatorlardyń qai aýylda bailanys joq ekenin ózderi aityp, moiyndai bastady», - dedi ministr.
Aitýynsha, kemshilikti moiyndaýshylardyń keibiri buǵan deiin vedomstvoǵa jalǵan málimet berip úlgergen.
«2021 jyly 200 aýylda bailanys pen internet bar dep aqparat bergen operatorlar 2022 jyly internet joq ekenin moiyndady. Óitkeni olar bizdiń aýyl-aýyldy aralap, qai jerde internet sapasy tómen ekenin anyqtap jatqanymyzdan qatelikti ózderi moiyndap, jumysty basynan bastaý jeńilirek bolatynyn túsindi. «Qazaqtelekom» ulttyq operatoryn teksergen kezde bizdiń qolymyzdaǵy bilimdi eskerýdi, tipti kei tusta jumysqa tartýlaryńyzdy suraimyz. Óitkeni bul kvazimemlekettik kompaniialar, jeke naryq. Oǵan biz tikelei aralasa almaimyz», - dedi Baǵdat Mýsin.
