Parlament Senaty Agrarlyq máseleler, tabiǵatty paidalaný jáne aýyldyq aýmaqtardy damytý komitetiniń keńeitilgen otyrysynda «1994 jylǵy 10 jeltoqsandaǵy QR Úkimeti men RF Úkimeti arasyndaǵy «Baiqońyr» keshenin jalǵa berý shartyna ózgeris engizý týraly hattamany ratifikatsiialaý týraly» zań jobasy qaraldy, dep habarlaidy QazAqparat.
Aita keteiik, Hattamaǵa 2017 jyly qarashada Cheliabi qalasynda eki el prezidentteriniń qatysýymen ótken QR men RF arasyndaǵy óńirlik yntymaqtastyq jónindegi forým aiasynda qol qoiyldy. Hattamamen «Baiqońyr» keshenin jalǵa berý sharty №2 qosymshasyn jańa redaktsiiada berý kózdelgen.
QR Aýyl sharýashylyǵy vitse-ministri Rústem Qurmanovtyń aitýynsha, sharttyń ekinshi qosymshasynda «Baiqońyr» kesheniniń tehnologiialyq jáne tehnikalyq nysandarynyń, tasymaldaǵysh zymyrandardan bólinetin bólikteri qulaityn aýdandarynyń koordinattary kórsetilgen.
Atap aitqanda, Hattamamen oǵan jalpy alańy 11,6 myń gektar tórt jer ýchaskesi jalǵa alý bóliginen shyǵarylady. Jalpy alańy 1 740 gektar eki ýchaske Qarmaqshy aýdany Tóretam kentin keńeitý úshin, sondai-aq 9 950 gektar eki ýchaske «Batys Eýropa-Batys Qytai» halyqaralyq tranzit dálizin, «Almaty-Máskeý» temirjolyn salý jáne «Beineý-Shymkent» gaz qubyrynyń jelilik bóligi úshin alynyp otyr.
Onyń sózine qaraǵanda, kórsetilgen jer telimderi Qyzylorda oblysynyń damýy úshin qajet. Osy sharalar óńirdiń áleýmettik jaǵdaiyna jáne ekonomikasyna oń áserin tigizedi.
«Bul jer telimderin jalǵa alýdan shyǵarý Resei tarapynyń Qazaqstanǵa jyl saiynǵy jalǵa alý tólemi somasynyń qysqarýyna yqpal etpeidi», - dedi R. Qurmanov.
Talqylaýdan keiin komitet músheleri zań jobasyn Parlament Senaty jalpy otyrysynyń qaraýyna shyǵarý týraly sheshimdi qabyldady.
