Búgin Nur-Sultan ýaqytymen tańǵy saǵat 04:13-te Baiqońyr ǵarysh ailaǵy 31-shi alańynyń «Vostok» ushyrý kesheninen Fregat» údemeli blogy jáne OneWeb britandyq 34 ǵarysh apparaty bar «Soiýz-2.1b» zymyran-tasyǵyshy ushyryldy, dep habarlaidy «QazAqparat» HAA.
Buǵan deiin zymyran-tasyǵyshty ushyrý tehnikalyq sebepterge bailanysty eki ret keiinge shegerilgen bolatyn. Al búgingi ushyrý sáti Roskosmostyń telestýdiiasynan tikelei efir arqyly kórsetildi. Tikelei reportajdy júrgizýshilerdiń aqparatyna sáikes, zymyran shtattyq rejimde ushyryldy. «Soiýz 2.1 b» zymyran-tasyǵysh satysynyń bólinýi ushý tsiklgrammasyna sáikes boldy. Zymyran ushyrylǵannan keiin 10 minýttan soń spýtnikter toptasy bar basty blok orbitaǵa shyqty.
OneWeb tómenorbitaldy ǵarysh apparattary jer betindegi tutynýshylardy tikelei spýtnik bailanysy arqyly jyldamdyǵy joǵary internetpen qamtamasyz etýge arnalǵan. Búginge deiin orbitaǵa 254 ǵarysh apparaty shyǵarylǵan bolatyn. Endi taǵy 34 spýtniktiń shyǵarylýymen olardyń sany 288-ge jetedi. Kompaniia jalpy sany 500-den astam spýtnikti Jer ainalasyndaǵy orbitaǵa shyǵaryp, olardy kommertsiialyq maqsatta paidalanýdy kózdep otyr.
