2021 jyldyń 9 sáýirinde «Soiýz-18» kóliktik ǵarysh kemesiniń «Baiqońyr» ǵarysh ailaǵynan ushyrylýy úlken oqiǵa boldy, dep habarlaidy QazAqparat.
Buǵan deiin jazǵanymyzdai, «Gagarin» ǵarysh kemesiniń ushyrylýy sátti ótti.
Ǵaryshkerler kúni qarsańyndaǵy mereitoilyq ushyrýdy kóptegen qonaqtar, mektep oqýshylary, el Premer-Ministri Asqar Mamin bastap kelgen úkimettik delegatsiia baqylady. QR Úkimetiniń tóraǵasy Baiqońyrǵa Roskosmos basshysymen kelissóz júrgizgý úshin kelgen.
Ushyrylǵan «Soiýz-MS-18» ǵarysh kemesi úsh saǵattan keiin Halyqaralyq ǵarysh stantsiiasynyń (HǴS) «Rassvet» modýlimen túiisip, taǵy birshama ýaqyttan soń MKS-65 ekspeditsiiasynyń ekipajy Oleg Novitskii, Petr Dýbrov jáne Mark Vande Hai HǴS bortyna aýysty.
Olardy Halyqaralyq ǵarysh stantsiiasynda Roskosmos ǵaryshkerleri Sergei Ryjik pen Sergei Kýd-Sverchkov qarsy aldy. Ǵaryshkerler «Iu.A. Gagarin» kóliktik basqarylatyn kemesi bar «Soiýz-2.1a» zymyran-tasymaldaǵyshynyń ushyrylý sátin sýretke túsirip alǵan. HǴS dál sol sátte Baiqońyrdyń ústimen ushyp bara jatqan.
Qazir orbitadaǵy ǵaryshtyq vahtada onnan asa adam bar: Roskosmostyń – tórt, NASA-nyń – bes ǵaryshkeri jáne Japondyq ǵarysh agenttiginiń bir ókili.
Roskosmos aqparatyna sáikes, «Soiýz MS-18» kemesi HǴS bortyna 169 kg júk jetkizgen. Olardyń arasynda ǵaryshtyq tájiribelerdi jáne reseilik ǵylymi baǵdarlama boiynsha meditsinalyq-biologiialyq zertteýlerdi jasaýǵa arnalǵan jabdyqtar, borttyq qujattama jasaýǵa kerek qural men kómekshi komplekt, jeke gigiena quraldary men azyq-túlik, sonymen qatar Iýrii Alekseevich Gagarinniń sýreti men ǵaryshqa alǵashqy adamnyń ushýynyń 60 jyldyǵyna arnalǵan mereitoilyq simvolika bar.
