Baiqońyr qalasynda ózennen tabylǵan oqýshynyń denesinde zorlyq-zombylyq belgileri joq. Bul týraly Qyzylorda oblysynyń ákimi Gúlshara Ábdiqalyqova málim etti, dep habarlaidy "Ult aqparat".
«Oqiǵaǵa bailanysty Baiqońyr qalasynda boldym.
Iz-túzsiz ketken kishkentai eki bala Anas Erhan men Orazbaev Nurálini izdestirýge RF IIMB, QR IIMP jeke quramy jumyldyryldy jáne 400 volonter tartyldy.
Qyzylorda oblysy Tótenshe jaǵdailar departamentiniń izdestirý toby jumyldyrylyp, onyń quramyndaǵy 1 birlik tehnika (qaiyq) jáne jeke quramnyń 7 adamy (súńgýirler, kinolog, psiholog) izdeý jumystaryna kiristi.
Qansha úmittensek te, ókinishke qarai, Syrdariia ózeniniń tikushaqpen ushý barysynda qalalyq mádeniet jáne demalys saiabaǵy aýdanynda súńgýirler Anas Erhannyń denesin tapty (júrgizilgen sot-meditsinalyq saraptamaǵa sáikes zorlyq-zombylyq óliminiń belgileri joq)», - dep jazdy G.Ábdiqalyqova Faceebook-te.
Oqýshy balanyń máiitine júrgizilgen saraptama qorytyndysyn Resei Federatsiiasy Tergeý komitetiniń «Baiqońyr» keshenindegi tergeý bólimi de jariialady.
«Júrgizilgen sot-meditsinalyq saraptamamen anyqtalǵany: ólimniń sebebi - sýǵa batý kezinde tynys alý joldarynyń jabylýynan bolǵan mehanikalyq asfiksiia. Denede ózge zaqymdanýlar joq.
E.A.Anasqa qatysty zorlyq-zombylyq jasalǵanyn nusqaityn málimetter joq.
Qazirgi ýaqytta tergeý amaldary, sondai-aq ekinshi balany izdep-tabý boiynsha shuǵyl-izdestirý sharalary jalǵasýda. Oǵan aviatsiialyq tehnika, súńgýirler, Baiqońyr qalasynyń turǵyndarynan quralǵan eriktiler toby jumyldyryldy», - delingen RF vedomstvosynyń saitynda.
Buǵan deiin habarlaǵanymyzdai, Qyzylorda oblysynyń ákimi Gúlshara Ábdiqalyqova keshe Baiqońyr qalasyndaǵy №275 orta mektebiniń 2«A» synyp oqýshysy Erhan Anastyń ata-anasymen kezdesip, kóńil aitty.
Málim bolǵandai, Erhannyń ákesi - Niiazbaev Amandyq Anasuly 33 jasta, «Baiqońyrenergo» ÓEB JBT elektrigi. Anasy - Ábdiqadyrova Qazyna Ábdivahanqyzy 33 jasta, №272 orta mekteptiń medbikesi. Tolyq otbasynda 3 bala tárbielengen. Erhan úiiniń úlkeni.
«Izdestirý is-sharalaryn ótkizý barysyn baqylaý sheńberinde QR Prezidentiniń «Baiqońyr» keshenindegi arnaýly ókili S. Súleimenovpen birge qala ákimshiliginiń basshysy K.D. Býsyginmen kezdestim. Balalardy izdeý boiynsha ótkizilgen jáne josparlanǵan is-sharalarmen tanysyp, qajetti tapsyrmalar berdim.
Sondai-aq, Baiqońyr qalasynyń quqyq qorǵaý organdary basshylarynyń (Qyzylorda oblysy jáne Baiqońyr qalasy boiynsha QR UQKD Baiqońyr qalasy basqarmasy, Baiqońyr qalasynyń prokýratýrasy, QR Baiqońyr qalasyndaǵy IIMP, Qarmaqshy aýdanynyń tótenshe jaǵdailar bólimi), Qarmaqshy aýdany ákiminiń orynbasary jáne mektep direktorlarynyń qatysýymen keńes ótkizip, osyndai aýyr faktilerdiń aldyn alý jáne oǵan jol bermeý maqsatynda oqýshylardyń ata-analary men oqytýshylar quramy arasynda túsindirý jumystaryn júrgizýdi tapsyrdym.
Qazirgi ýaqytta joǵalǵan Baiqońyr qalasyndaǵy №277 mektep-litseiiniń 2 «v» synyp oqýshysy Nuráli Nursultanuly Orazbaevty izdestirý sharalary jalǵasýda.
Qadirli jerlesterim!
Paraqshama jazǵan pikirlerińizdi oqimyn. Sizderdiń jazbalaryńyzǵa, pikirlerińizge qatysty orynbasarlaryma, basqarma basshylaryna, qala, aýdan ákimderine tapsyryp otyramyn.
Osy oraida, sizderden kishkentai balalaryńyzdy jeke ózderin eshqaida jibermeńizder, úide qaldyrmańyzdar, muqiiat bolyńyzdar dep taǵy da suraimyn.
Balalarymyz aman, jurtymyz tynysh, elimiz beibit bolsyn», - dep jazdy óńir ákimi.
Eske salsaq, 20 aqpan kúni Baiqońyrda 2 oqýshy joǵalyp ketken bolatyn. Izdestirý jumystary barysynda olardyń biriniń Erhan Anastyń denesi sýdan tabyldy.
