Apatqa ushyraǵan «Soiýz MS-10» kemesiniń ekinshi satysy Jezqazǵannan 30-35 shaqyrym jerge qulaýy múmkin. Bul týraly búgin QR IIM Tótenshe jaǵdailar komitetiniń tóraǵasy Vladimir Bekker aitty, dep habarlaidy QazAqparat tilshisi.
«Apatqa ushyraǵan ǵarysh kemesiniń ekinshi satysynyń qazirgi ýaqytta qai jerde qulaǵany belgisiz. Eldi mekenderden, jergilik atqarýshy organdardan jáne ózge de tulǵalardan azamattyq qorǵanys organdaryna qandai da bir aqparat kelip túsken joq», - dedi Vladimir Bekker.
Onyń aitýynsha, izdeý-qutqarý toby ǵarysh kemesiniń ekinshi satysynyń qulaǵan jerin anyqtaý jumystaryn júrgizip jatyr. Atalǵan ǵarysh kemesine otyn retinde kerosin men ottek paidalanylǵan.
«Ǵarysh kemesiniń ekinshi satysy shamamen Qaraǵandy oblysynyń Jezqazǵan qalasy mańynda qulaýy yqtimal. Roskosmos mamandarymen sóileskenimizde, olar zymyran bóshegi qulaýy múmkin aýdandy atady. Iaǵni, Jezqazǵan qalasynan 30-35 shaqyrym jerge qulaýy múmkin. Zymyran bólshekteri qulaityn traektoriiada eshqandai eldi meken joq. Zymyrannyń ekinshi bólshegi eldi mekenge qulaǵan bolsa, onda osy ýaqytqa deiin aqparat bolar edi», - dedi komitet tóraǵasy.
Buǵan deiin ǵarysherlerdiń din-aman ekendigin, qazirgi ýaqytta olardy izdeý-qutqarý toby Baiqońyr ǵarysh ailaǵyna apara jatqanyn habarlaǵan bolatynbyz.
Aita keteiik, búgin 14 saǵat 40 minýt 15 sekýndta Baiqońyr ǵarysh ailaǵynyń Gagarin start alańynan orbitaǵa basqarylatyn kóliktik «Soiýz MS-10» kemesin alyp shyǵýy tiis «Soiýz FG» zymyran tasyǵyshy ushyryldy. Biraq start berilgen soń birneshe minýttan keiin Roskosmos saityndaǵy tikelei kórsetilim úzilip, diktor «zymyran tasyǵyshtyń apatqa ushyraǵanyn» habarlaǵan edi.
«Soiýz MS-10» kemesiniń bortynda Roskosmos ǵaryshkeri Aleksei Ovchinin men NASA ǵaryshkeri Nik Heig bar.
Sál keiinirek apatqa ushyraǵan zymyrannyń videosy jariialandy.
