Baiqońyrdaǵy Qazaqstan balabaqshalarynda 460 bala tárbielenip jatyr. Bul týraly Senat depýtattarynyń saýalyna QR Premer-Ministri Asqar Maminiń jaýabynda aitylǵan, dep habarlaidy "Ult aqparat".
«Búgingi kúni Baiqońyr qalasynda 16 balabaqsha, onyń ishinde Qazaqstan Respýblikasynyń Memlekettik jalpyǵa mindetti bilim berý standarttaryna (budan ári – MJMBS) sáikes qazaq tilinde oqytatyn 3 balabaqsha bar. Balabaqshalarda barlyǵy 2 885 bala (onyń ishinde Resei Federatsiiasynyń balabaqshalarynda – 2 425, Qazaqstan Respýblikasynyń balabaqshalarynda – 460 bala) tárbielenip jatyr», - dedi Asqar Mamin .
Onyń atap ótýinshe, balalarǵa qazaq tilinde tárbie berý jáne oqytý maqsatynda 2019 jyly memlekettik-jekeshelik áriptestik aiasynda eki jekemenshik balabaqsha ashylǵan.
«Sonymen qatar, qazaq tilinde oqytatyn 280 oryndyq balabaqsha ashý maqsatynda burynǵy № 21 «Vasilek» balabaqshasynyń ǵimaratyn Resei Federatsiiasynyń balansynan alý jáne ony Qarmaqshy aýdany ákimdiginiń kommýnaldyq menshigine berý jumystary júrgizilýde», - dedi Úkimet basshysy.
