Sailaý kúni baiqaýshylar sailaý ýchaskesinde foto jáne videotúsirilimdi qalai júrgize alady? Munyń qyr-syryn Ortalyq sailaý komissiiasynyń múshesi Serik Sydyqov túsindirdi, dep habarlaidy QazAqparat.
Aita ketsek, Aqparat jáne qoǵamdyq damý ministrligi Ortalyq sailaý komissiiasymen birge ÚEU akademiiasy» bilim berý jobasy sheńberinde sailaýdy baiqaý negizderin túsindirýge arnalǵan seminar ótkizip jatyr. Otyrysqa onlain rejimde 500-den astam adam qatysýǵa niet bildirgen. Jiynda sailaýdy baiqaý negizderi túsindirilýde.
«Baiqaýshylardyń daýys berý men qorytyndy shyǵarý protsesine kedergi keltirmei, foto, aýdio jáne videojazba júrgizýge qatysty quqyq erekshelikterin tolyǵyraq túsindirip berýge ruqsat etińizder. Bul quqyqty qoldaný – Qazaqstan Respýblikasynyń Konstitýtsiiasy kepildik bergen adamnyń quqyqtary men erkindigin, sonymen birge konsýtitýtsiialyq zańda bekitilgen qupiia daýys berý qaǵidattaryn qorǵaý qaǵidatyna qol suǵý retinde eseptelmeidi», - dedi Serik Sydyqov.
OSK múshesi Konstitýtsiianyń 18-babynyń 1 jáne 2 bóligin eske saldy. Olar: Birinshi – árkimniń jeke ómirine qol suǵylmaýyna, óziniń jáne otbasynyń qupiiasy bolýyna, ar-namysy men abyroily atynyń qorǵalýyna quqyǵy bar; Ekinshi – árkim óziniń jeke salymdary men jinaǵan qarajatynyń, jazysqan hattarynyń, telefon arqyly sóilesken sózderiniń, poshta, telegraf arqyly jáne basqa joldarmen alysqan habarlarynyń qupiialylyǵy saqtalýyna quqyǵy bar. Bul quqyqty shekteýge zańda tikelei belgilengen retter men tártip boiynsha ǵana jol beriledi.
Sonymen birge Serik Sydyqov Qazaqstan Respýblikasyndaǵy sailaý týraly Zańynyń 8-babyna sáikes «Respýblika Prezidentin, Parlamentiniń jáne máslihattarynyń depýtattaryn, ózge de jergilikti ózin-ózi basqarý organdarynyń múshelerin sailaýda jasyryn daýys beriletindigin ári sailaýshylardyń óz erkin bildirýine qandai da bolsyn baqylaý jasaý múmkindigine jol berilmeitinin» eske saldy. Al Azamattyq kodekstiń 145-babyna sáikes, kelisiminsiz eshkim de bireýdiń sýretin paidalana almaidy.
«Tiisinshe, foto, aýdio jáne videojazbanyń ózi baiqaýmen birdei jeke málimetterdiń, sonymen qatar sailaýshylardyń tiziminiń qupiialylyǵy saqtalatyndai júrgizilýi kerek», - dedi ol.
Onyń aitýynsha, baiqaýshy sailaý barysyndaǵy óziniń foto, aýdio jáne videojazba júrgizý quqyǵyn qoldaný kezinde sailaý ýchaskesindegi atalǵan erejeniń saqtalýy boiynsha sailaý komisiiasy tóraǵasynyń orynbasarynyń talaptaryn oryndaýy kerek», - dep túidi Serik Sydyqov.
