Báidibek aýdanynda 100 oryndyq mektep paidalanýǵa berildi

Táýelsizdik kúnine orai Túrkistan oblysy, Báidibek aýdany, Bestoǵai aýylynda saltanatty túrde 100 oryndyq Dosan mektebi paidalanýǵa berildi, dep habarlaidy «Ult aqparat» oblys ákimdiginiń baspasóz qyzmetine silteme jasap.

Mekteptiń jańa ǵimaratynyń ashylýyna aýdan ákiminiń orynbasary Berik Turlybekov, aýdandyq máslihat hatshysy Asqar Kenehan qatysyp, ózderiniń quttyqtaý tilekterin bildirip, aýyl turǵyndarynyń qýanyshyn bólisti.

Saltanatty sharada Bestoǵai eldi mekenindegi Dosan mektebiniń ustazdary men oqýshylary jáne aýyl turǵyndary eki qabatty bilim oshaǵynyń ózderiniń aýyldarynda boi kóterip, Táýelsizdik kúni merekesine orai el igiligine paidalanýǵa berilip otyrǵandaryna rizashylyqtaryn jetkizdi. Aýyl qariialary aldaǵy ýaqytta osy jańa ǵimaratta ulaǵatty ustazdar, elimizdiń maqtanyshy bolatyndai shákirtter tárbielep ósire bersin dep aq batalaryn berdi.

Eki qabatty mekteptegi oqý synyptary tolyq jańa partalarmen jáne taqtamen jabdyqtalyp, kompiýter, biologiia, fizika synyptarymen jáne tigin sheberhanalarymen, kitaphana, oqý jáne sport zaldarmen qamtylǵan.

Jalpy Báidibek aýdanynda yńǵailastyrylǵan jaida ornalasqan mektepterdiń sany jyldan jylǵa qysqaryp, 49 bilim berý mekemesiniń qazirgi tańda 44-i tiptik jaida ornalasqan. Ár jyl saiyn oqýshylardyń jańa mektepterde bilim alýyna jaǵdai jasalýda.