AQSh halyqaralyq arenaǵa oralady. Jeksenbi, 13 maýsym Kornýolda (Ulybritaniia) "Úlken jetilik" sammitinen keiin uiymdastyrylǵan qorytyndy baspasóz jiyny kezinde AQSh prezidenti Djo Baiden osylai dep málimdedi. G7 elderi koronavirýspen kúres máselelerin, Qytaidyń halyqaralyq saýdaǵa yqpaly jáne ózge máselelerdi talqylady, dep jazady Azattyq.
Baspasóz jiyny kezinde 16 maýsymǵa belgilengen AQSh prezidenti Djo Baiden men Resei basshysy Vladimir Pýtinniń kezdesýi jóninde de sóz boldy. Baidenniń aitýynsha, ol prezident bolmai turyp ta Pýtinge onyń AQSh-taǵy sailaýǵa kiligýin zertteitinin eskertken. Barlaý derekterine qanyqqan Baiden Pýtin Reseidiń AQSh-taǵy sailaý kampaniiasyna kiligýine aralasqan degen tujyrym jasaǵan.
Djo Baiden AQSh "soǵysqa qumar bolyp otyrǵan joq", ol tek Resei halyqaralyq normalarǵa qaishy áreketin túsindirýi tiis dep sanaidy dedi.
Onyń pikirinshe, ózara kezdesip, máseleni talqylaý – jaǵdaidy túsinýdiń ońtaily joly. "Ózara týyndaǵan máselelerdi onymen ashyq talqylaimyn. Buǵan sizderde de kúmán joq ekenin bilemin" dedi Baiden.
Ol Reseimen kiberqylmyskerlerdi almastyrý máselesin talqylaýǵa da ashyq ekenin jetkizdi. Ol sonymen birge Liviia boiynsha da Reseimen birge jumys isteýge daiyn.
Jýrnalister suraqtaryna jaýap bergen AQSh prezidenti Pýtinmen ortaq baspasóz máslihatyn ótkizýden bas tartýynyń sebebin túsindirdi.
"Bul - kim baspasóz jiynynda ózin myqty kórsetedi, kim kimdi yńǵaisyz jaǵdaiǵa qaldyrǵysy keledi degen syńaidaǵy jarys emes. Másele onda emes. Másele eki el arasyndaǵy qarym-qatynasty jaqsartýdyń qandai amal-sharttary bar, osyny aiqyn jetkizgim keledi... Árkim kezdesýdiń qalai ótkenin óz kózqarasy turǵysynan baiandaidy. Biraq men bar nazar kim qalai amandasty, kim qalai ózin ustady degen siiaqty máselelerge burylýyn qalamaimyn, – dedi Baiden.
