Ózbekstan prezidenti Shavkat Mirziioev Naýryz merekesi Ortalyq Aziia halyqtarynyń ortaq maqsaty men armanyn bildiretin meiram ekenin atap ótken.
"Adamzat tarihynda úlken oryn alatyn osy aitýly mereke halyqtarymyz ben elderimiz arasyndaǵy dostyq arqaýyn bekemdeýge, yntymaqtastyq pen úilesimdi qatynastardy nyǵaitýǵa ólsheýsiz úles qosady. Biz eki el arasyndaǵy ózara senim men qurmetke negizdelgen tatý kórshilik bailanystarymyzdy, strategiialyq seriktestigimiz ben odaqtastyq qatynastarymyzdy odan ári keńeite beretinimiz sózsiz", - delingen quttyqtaý hatta.
Tájikstan prezidenti Emomali Rahmon óz quttyqtaýynda qazirgi kúrdeli áleýmettik-ekonomikalyq jáne geosaiasi jaǵdaida ózara qurmet pen qoldaýdyń, dostyq pen birliktiń, beibitshilik pen turaqtylyqtyń, órleý men jasampazdyqtyń biik maqsattaryna úndeitin kóktem merekesiniń jalpyadamzattyq qundylyqtarynyń máni arta túsetinin jazǵan.
"Qasterli Naýryz merekesiniń izgi dástúrlerine negizdelgen Tájikstan men Qazaqstan arasyndaǵy dostyq, strategiialyq seriktestik qatynastary halyqtarymyzdyń túpki múddelerine sáikes aldaǵy ýaqytta da damyp, keńeie beredi", - dep jazǵan Emomali Rahmon.
Ázerbaijan prezidenti Ilham Álievtiń quttyqtaý jedelhatynda Ázerbaijan men Qazaqstan arasyndaǵy dostyq, tatý kórshilik jáne yntymaqtastyq búginde Naýryz meiramynyń ejelgi dástúrlerin saqtap kele jatqan halyqtarymyzdyń múddesi jolynda odan ári damyp, nyǵaia túsetinine senim bildirdi.
"Ózimniń jáne ázerbaijan halqynyń atynan sizdi jáne halqyńyzdy qasietti Naýryz meiramymen shyn júrekten quttyqtaimyn. Bul mereke - tabiǵatqa degen sheksiz mahabbat pen úlken qurmettiń belgisi. Myńdaǵan jyldar boiy synaqqa tózip kelgen ómirlik filosofiianyń nyshany", - delingen quttyqtaý jedelhatta.
Prezident Qasym-Jomart Toqaevtyń atyna óz quttyqtaýlaryn Túrki memleketteri uiymynyń bas hatshysy Baǵdat Ámireev, Kavkaz musylmandar basqarmasynyń tóraǵasy, TMD dinaralyq keńesiniń tóraǵalyǵyn qosa atqarýshy sheih-ýl-islam Allahshúkir Pashe-zade, "Shevron" korporatsiiasy eýraziialyq bólimshesiniń basqarýshy direktory Derek Magness, Eýraziialyq damý bankiniń basqarma tóraǵasy Nikolai Podgýzov, Baiqońyr qalasy qalalyq ákimshiliginiń basshysy Konstantin Býsygin jáne basqalary joldady.
Quttyqtaý jedelhattary áli de kelip túsip jatyr.
