AQSh prezidenti Djo Baiden men AQSh qorǵanys ministrliginiń ókili Djon Kirbi Aýǵanstanǵa "Ál-Qaida" terrorlyq uiymynyń ornyǵý qaýpi jóninde eki túrli boljam aitty. Bul jóninde "Interfaks" agenttigi habarlady, dep jazady Azattyq.
Amerika áskerin Aýǵanstannan alyp ketý sheshiminiń durys bolǵanyn juma kúni taǵy qaitalaǵan Djo Baiden "Ál-Qaidanyń" kózin joiý arqyly AQSh Aýǵanstandaǵy óz missiiasyn oryndady dedi.
- Buǵan perspektiva turǵysynan qaraiyqshy. Qazir "Ál-Qaida" joq, endeshe Aýǵanstanǵa qandai qyzyǵýshylyǵymyz bar? Biz Aýǵanstanǵa "Ál-Qaidanyń" kózin joiamyz, Osama ben Ladendi qolǵa túsiremiz degen aiqyn maqsatpen bardyq. Buǵan qol jetkizdik, - dedi AQSh prezidenti.
Baidenniń málimdemesinen soń jýrnalister suraqtaryna jaýap bergen Pentagon ókili Djon Kirbi Aýǵanstanda "Ál-Qaida" áli bar dedi.
- Aýǵanstanda "Islam memleketi" de, "Ál-Qaida" da áli bar ekenin burynnan aityp kelemiz, - dedi ol.
"Ál-Qaida" terroristeriniń Aýǵanstandaǵy sany "sonshalyq kóp emes, biraq bizdiń qolymyzda naqty derek joq" dedi Kirbi. Onyń aitýynsha, Pentagonnyń Aýǵanstannan barlaý málimetin alý múmkindigi burynǵydai kóp emes.
Baidenniń málimdemesine qatysty pikir aitqan Kirbi: "20 jyl burynǵy 11 qyrkúiek oqiǵasy kezindegidei bizdiń elge qaýip tóndiretin kóp terrorist joq dep oilaimyz" dedi.
2001 jylǵy 11 qyrkúiektegi Niý-Iorkte bolǵan joiqyn teraktiden soń AQSh bastaǵan halyqaralyq kúshter Aýǵanstanda terrormen kúres operatsiiasyn bastaǵan. Keiin sol terrorlyq operatsiiany uiymdastyrdy degen "Ál-Qaida" basshysy Osama ben Laden óltirilgen. Sodan beri Aýǵanstandaǵy shetel áskerin alyp ketý máselesi jii kóterilip turady.
AQSh biylǵy mamyrdan bastap Aýǵanstandaǵy áskerin shyǵaryp jatyr, bul operatsiia tamyzdyń sońynda aiaqtalýy tiis bolǵan. El aimaqtaryn birtindep basyp alyp jatqan "Taliban" toby 15 tamyzda Kabýldy ózine qaratyp, Batys qoldaýyna súienetin zańdy úkimet qulady, prezident Ashraf Ǵani elden qashty. Qazir munda "Taliban" áskerinen zardap shegýi múmkin degen sheteldikter men aýǵandardy evakýatsiialaý júrip jatyr.
