AQSh prezidenti Djo Baiden maýsym aiynda Eýropaǵa sapary kezinde reseilik áriptesi Vladimir Pýtinmen kezdesýdiń sáti túsip qalar dep úmittenedi.
"Osylai bolady dep úmittenemin jáne kútemin. Soǵan kúsh salyp jatyrmyz" dedi Baiden 4 mamyr kúngi koronavirýs ahýalyna arnalǵan baspasóz jiyny kezinde jýrnalisterge.
Prezident qyzmetine kiriskeli beri alǵash ret shetelge jasaǵaly otyrǵan saparynda Baiden "Úlken jetilik" (G7) elderiniń basshylarymen kezdesýdi josparlap otyr. G7 sammiti 11-13 maýsymda Ulybritaniiada ótedi. Sammitten soń Baiden 14 maýsymǵa belgilengen NATO sammitine qatysý úshin Briýsselge ushady. Ol jaqta EO – AQSh konferentsiiasyna da qatysady dep aitylady.
Sáýir aiynda Baiden Pýtinge eki el arasynda qordalanyp qalǵan máselelerdi (Ýkrainaǵa tóngen qaýip, SolarWinds amerikalyq kompiýterlerge kibershabýyly, Resei biliginiń oppozitsiialyq saiasatker Aleksei Navalnyidy túrmege jiberýi) talqylaý úshin úshinshi elde kezdesýdi usynǵan.
Pýtinniń syrtqy saiasat jónindegi kómekshisi Iýrii Ýshakov eki prezidenttiń kezdesýin uiymdastyrý boiynsha sharýalarmen ainalysyp jatqanyn habarlady. "Maýsymda deidi, tipti naqty kúni de belgilengen" dedi Ýshakov.
Ótken aida Resei Vashingtonnyń on reseilik diplomatty elden shyǵaryp, sanktsiiany kúsheitkenine "jaýap retinde" AQSh-tyń Máskeýdegi elshiliginiń on qyzmetkerin "persona non grata" dep jariialaǵan. Sanktsiia Kremldiń AQSh-qa qarsy áreketi úshin jazalaý talpynysy retinde baǵalanǵan.
Baiden Reseidiń qastyq jasaǵany anyqtalsa, qatań jaýap beretinin birneshe ret eskertken. Biraq ortaq múddeler alańynda (mysaly, iadrolyq qarýdyń taralýy, ǵalamdyq klimattyń ózgerýi, Iranmen iadrolyq kelisim, Soltústik Koreia máselesi jáne Aýǵanstanda beibitshilik pen turaqtylyqty nyǵaitý) Máskeýmen áriptestik ornatýǵa daiyn ekenin de jetkizgen.
3 mamyrda Londonǵa sapary kezinde AQSh memlekettik hatshysy Entoni Blinken Vashington Máskeýmen qarym-qatynasynyń "turaqty, josparly" bolǵanyn qalaidy, biraq aqyr sońynda bul qarym-qatynastyń sipaty Kremldiń saiasatyna qarai anyqtalady dep málimdegen.
