AQSh áskerin Aýǵanstannan áketý kezindegi haosqa, "Taliban" aiaq asty Kabýldy basyp alǵanyna bailanysty el ishinde hám shetelde synǵa qalǵan Djo Baiden 20 tamyzda amerikalyqtardy Aýǵanstannan qalai da tolyq alyp ketýge ýáde berdi.
Aq úide jasaǵan málimdemesinde Baiden Kabýlǵa 6 myń soldat jiberýdiń arqasynda AQSh bastaǵan evakýatsiia operatsiiasy "birshama qarqyn alǵanyn", qazir tasymal turaqty túrde júrip jatqanyn málimdedi. "Taliban" Kabýlǵa kirgen alǵashqy kúnderi áýejaidy myńdaǵan adam basyp qalyp, alasapyran bastalǵan. Tálipterden qashqan jurt ushý alańyna kirip, ushaqtyń tóbesine shyǵyp, shassiine jabysyp, birtalaiy mert bolǵan.
"Bul – áýemen tasymaldaýdyń tarihtaǵy eń úlken ári eń aýyr sharasy" degen AQSh prezidenti evakýatsiia barysynda Amerika odaqtastarymen, áriptesterimen jáne NATO-men qoian-qoltyq jumys istep jatqanyn aitty.
Baiden Aýǵanstannan barlyq amerikalyqty, AQSh basqarǵan halyqaralyq kúshtermen jumys istegen aýǵandardy jáne áiel liderler, jýrnalister siiaqty qaýip tónýi múmkin degen top ókilderin qaýipsiz jaqqa alyp ketýge ýáde berdi.
Onyń aitýynsha, AQSh áskeri 14 tamyzdan beri 13 myń, al tamyz aiynda 18 myń adamdy Aýǵanstannan shyǵarǵan. Buǵan qosa myńdaǵan adam "AQSh úkimetiniń kómegimen" charterlik jeke reistermen ushyp ketken.
Ushaqqa minýge tyrysqan myńdaǵan aýǵan Kabýl áýejaiynyń ainalasynda júr, kei aqparat quraldarynyń habarlaýynsha "Taliban" áskeri áýejaiǵa ótpek bolǵandardyń jolyn bógep, olardy qorqytyp, uryp-soqqan. Evakýkatsiia kútip áýejai ishinde myńdaǵan adam otyr.
Osynyń aldynda Pentagon jasaǵan málimdemeni qaitalaǵan Baiden "Taliban" elden shyǵarmai jatqandar arasynda AQSh azamattary joq ekenin aitty. Onyń aitýynsha, AQSh-tyń resmi tulǵalary amerikalyqtar men basqalardy qaýipsiz jaǵdaida shyǵaryp áketý úshin "Taliban" ókilderimen turaqty bailanys ustap otyr.
Pentagon Kabýldy "Taliban" basyp alǵaly AQSh áskerileri alǵash ret áýejaidan syrtqa shyqqanyn 20 tamyzda habarlady. Áskeriler úsh Chinook tikushaǵymen qonaqúide qalyp, áýejaiǵa jete almai otyrǵan 169 Amerika azamatyn alyp shyqqan.
Pentagon ókili Djon Kirbidiń aitýynsha, amerikalyqtar qonaqúiden áýejaiǵa jaiaý barmaqqa oqtalǵan, biraq keiin bul raiynan qaitqan.
20 tamyzda AQSh memlekettik hatshysy Entoni Blinken ómirine qaýip tóngendikten Aýǵanstannan evakýatsiialanǵan jergilikti halyqty tym quryǵanda ýaqytsha panalatýǵa 13 el kelisim bergenin aitty. Taǵy ondaǵan el evakýatsiialanǵandardy alyp ótetin ótkel bolýǵa ýáde etken.
Blinkenniń aitýynsha, AQSh-ta qonystanýǵa áli ruqsat almaǵan bosqyndar Albaniia, Kanada, Kolýmbiia, Kosta Rika, Chili, Kosovo, Soltústik Makedoniia, Meksika, Polsha, Katar, Rýanda, Ýkraina jáne Ýgandany panalai turady.
Al tranzit elder qatarynda BAÁ, Bahrein, Britaniia, Germaniia, Daniia, Italiia, Katar, Kýveit, Qazaqstan, Ózbekstan, Tájikstan jáne Túrkiia bar.
