Nur Otan partiiasy Tóraǵasynyń birinshi orynbasary Baýyrjan Baibek Almatydaǵy «Qazaqfilm» AQ-na tiesili «daýly» jer bóligine qatysty pikirin aitty. Buǵan deiin qoǵam belsendisi Janbolat Mamai atalǵan telimdi B.Baibek ózi iemdenip aldy degen aqparat taratqan bolatyn.
Almaty qalasy eks-ákiminiń aitýynsha, ol jerde etno-aýyl qurylysy bastalýy kerek bolǵan. Alaida, keiin joba júzege aspai, 5,5 gektar jer memlekettiń menshiginde qaldyrylǵan.
«Belsendi Janbolat Mamaidyń videoroliginiń kóp bóligi meniń Almaty ákimi retindegi qyzmetime arnalǵan. Jerdi iemdenip aldy degen syńaily túrli aiyptaý aitylyp jatyr. «Jer bar jerde daý bar» - deidi ǵoi. Jer – qazaqtar úshin qasietti uǵym, biz úshin jer máselesi óte mańyzdy ekenin barshamyz bilemiz», - dedi Baýyrjan Baibek bloger Táńirbergen Berdońǵarovqa bergen suhbatynda.
Ol «Qazaqfilmniń» Keńes Odaǵy kezinde qurylǵanyn jáne 17 gektar jeri bar, 100 paiyz memlekettik kásiporyn ekenin eske saldy. Aýmaqtyń jartysynda kinostýdiia ǵimaraty ornalassa, ekinshi jartysynda dekoratsiialar jasalyp, túsirilim júrgiziledi.
«Etno-aýyl salý týraly ideia «Qazaqfilm» basshylyǵynyń ózinen tústi, konteinerlerdi ózimiz jetkizemiz dedi. Qala óz qarjysyna etno-aýyl sala alady ma degen másele de turdy. Osyndai talqylaýlardan keiin «Qazaqfilmge» tiesili 5,5 gektar jerge etno-aýyl salý týraly sheshimge keldik. Jobany ákimdik qarjylandyryp, daiyn bolǵanda Mádeniet basqarmasynyń menshigine ótkizýi tiis bolǵan», - deidi partiia Tóraǵasynyń birinshi orynbasary.
Alaida, qalada bilik aýysqannan keiin joba belgisiz sebeptermen júzege aspai qalypty. Al, oǵan qarastyrylǵan jer telimi memlekettiń menshiginde qala bergen.
«Aitqym keletin bir másele, Elbasynyń «Rýhani jańǵyrý» baǵdarlamasynda Almatydaǵy birneshe nysan kieli jerler kartasyna endi. Olar: Táýelsizdik monýmenti, Voznesensk kafedraly shirkeýi, Raiymbek batyrdyń kesenesi jáne Boraldai saq qorǵandary. Biz osy nysandarmen ainalystyq. Mysaly, Qairat Boranbaev óz qarajatynan ákimdik aldyna óte ádemi qoǵamdyq keńistik jasady. Qazir onda balalar serýendep, ýaqyt ótkizedi. Sondai-aq, ol óz aqshasyna Táýelsizdik monýmentin abattandyrdy», - dedi Baibek.
Ol Almatyda qyzmet etken jyldary qalany damtyýdyń 2020 jylǵa deiingi baǵdarlamasy qabyldanǵanyn, onyń negizgi baǵyttarynyń biri – týrizmdi damytý bolǵanyn eske saldy. Nátijesinde jyl saiynǵy týrister sany 10%-ǵa ulǵaiyp, 2018 jyly shetelden keletin týristerdiń sany 35 paiyzǵa ósti. Búginde Qazaqstanǵa kelgen árbir ekinshi týrist mindetti túrde Almatyǵa soǵady.
