Almaty ákimi Baýyrjan Baibek básekege qabiletti memleketter qatarynan kóringimiz kelse, OESR standarttaryna sai reformalardy júzege asyrý tiispiz dep esepteidi. Bul týraly ol OKQ-da ótken baspasóz máslixatynda málimdedi, dep xabarlaidy Baq.kz tilshisi.
«Jańany qurý ekonomika úshin tiimdi. Eger Eýropa, AQSh sekildi ómir súrgimiz kelse sol elderdei reformalar qabyldaýymyz kerek. Úlken tabysqa jetken elder reformanyń qarapaiym jolymen júrmegen. Básekege qabiletti memleketter qatarynan kóringimiz kelse, OESR standarttaryna sai reformalardy júzege asyrýǵa tiispiz. Bul eń aldymen, ómir súrýdiń joǵary deńgeii, jańa ári tiimdi ekonomika. Al ákimder úshin mańyzdy mindet - ómir súrý standarttarynyń sapasyn jaqsartý. Osy maqsatty iske asyrý barysynda halyqaralyq «McKinsey» sarapshylarynyń qatysýymen «Almaty-2020» baǵdarlamalyq reformasy qabyldandy jáne ol kópshiliktiń talqylaýynan ótti, qazirgi kezde oidaǵydai júzege asyrylyp jatyr», - dedi Baýyrjan Baibek.
Sonymen birge qala ákimi áleýmettik jelide qatań synǵa alǵandarǵa jaýap berdi.
«Biyl bárin qaita qazyp tastady dep bizdi qatty synǵa aldy. Biz olarǵa úsh ai shydańyzdar, 5-10 jyldan soń osy kósheler úshin qýanatyn bolasyzdar dedik. Osylai boldy. Joba bastalǵanda turǵyndardyń bári bul jumysqa jaqsy qarady dep aita almaimyz. Áleýmettik jeli de, BAQ ta synady. Biraq únemi adamdar beiimdelýi úshin tepe-teńdikte ustap turý kerek. Jańanyń bári kedergi keltiredi. Alǵa jyljý úshin oryndy esepteý kerek qoi», - dedi ol.
Ákim turǵyndardyń pikirin suramaidy degen syn da jaýapsyz qalmady.
«Biz muny eki jyl buryn talqylaǵan kezde oǵan kópshilik jái ǵana talqylap qoia salady dep nazar aýdarmady. Bárińizge «Almaty-2020» baǵdarlamasyn oqyńyzdar deimin. Sol jerde 100 indikator bar. Qazirgi atqarylyp jatqan jumystardyń bári sonda jazylǵan», - dedi Baýyrjan Baibek.
