Búgin «Nur Otan» partiiasynyń praimeriz sharasyna qatysýshylardyń jumystarymen tanysqan partiia tóraǵasynyń birinshi orynbasary Baýyrjan Baibek olardyń júieli sheshimderdi talap etetin kúrdeli máselelerdi kóterge bilgendigin aitty.
Praimeriz sharasyna qatysýshylarǵa qatysty pikirin Baýyrjan Baibek Facebook paraqshasynda jariialady.
«Áriptesterimmen birge partiiaishilik praimeriz qatysýshylarynyń úgit-nasihat kezdesýine bardym. Elordanyń Esil aýdany boiynsha 15 kandidat «Nur Otan» partiiasynyń Ortalyq apparaty janyndaǵy bastaýysh uiymda óz sailaýaldy baǵdarlamalarymen tanystyrdy. Is-shara jarys sipatynda bolǵanymen, ózara syilastyq aiasynda ótti. Qatysýshylardyń árbirin qoldaýǵa tyrystym, keńesimdi berip, máseleni naqtylai túsetin suraqtar qoidym»,-deidi partiia tóraǵasynyń birinshi orynbasary.
Onyń jazýynsha, úmitkerlerdiń ózderin ustaýyn, jurt aldynda sóz sóileýin tamashalaý óte qyzyqty boldy. Olardyń barlyǵynda derlik qyzyqty da kreativti beinerolikteri, ózindik «artyqshylyqtary» bar. Tipti keiiberýleriniń úgit baǵdarlamalarymen QR-kod arqyly tanysýǵa bolady.
Qatysýshylar arasynda qazir qyzmet atqaryp júrgen depýtattar da, saiasi qadamyn jańa bastap jatqan jastar da bar. Sondai-aq partiia qurylǵan sátten bastap múshe bolyp kele jatqandar da, taiaýda ǵana partiia qataryna qosylǵandar da kezdesti.
«Ásirese, birneshe jyl buryn AQSh-qa qonys aýdaryp, keiinnen elge qaita oralǵan azamattyń balalar men jasóspirimder arasynda esirtkiniń taralýyna qarsy kúresi boiynsha keltirgen derekteri men usynǵan is-sharalary jurtshylyq nazaryn aýdardy.
Óz baǵdarlamasynda elordany zamanaýi ýrbanistika qaǵidattaryna sáikes damytý máselelerin ózek etken eń jas kandidatqa «Bolashaq» qaýymdastyǵy qazaq tiline aýdarǵan «Baqytty qala» degen jaily qalalyq orta qurý týraly kitapty syilaiyn dep sheshtim.
Jalpy, qatysýshylar qyzyqty da júieli sheshimderdi talap etetin kúrdeli máselelerdi kótere bildi. Olardyń qatarynda bilim jáne densaýlyq saqtaý, halyqtyń áleýmettik toptaryn qoldaý, buqaralyq balalar sportyn damytý jáne basqalary bar.
Partiiamyzdyń Lideri N.Á. Nazarbaev tapsyrǵandai, praimerizde aitylǵan barlyq usynystar men eskertýler bizdiń árbir óńir, qala jáne aýdan boiynsha ázirlengen 216 sailaýaldy baǵdarlamamyzdy pysyqtaý kezinde eskeriletin bolady»,-dep jazdy Baýyrjan Baibek.
Árine, kandidattar ár qily. Árqaisysynyń daiyndyq deńgeii men jeke bekgraýndtary da ár túrli. Olardyń qaisysy jeńis tuǵyrynan kórinetinin sailaýshy sheshedi. «Munda bir jaitty anyq aita alamyn: osynaý praimerizden birinshi bolyp ótkender teńdessiz saiasi tájiribe jinaqtap, ár túrli aýditoriialarda sóz sóileý daǵdysyn meńgeredi, ózderiniń myqty jáne osal tustaryn ańǵaryp, tyńdaýshylardy óz sózine ilandyryp, óz pozitsiiasyn dáleldeý qabiletin ushtaityn bolady. Osy oraida kezdesýge qatysýshylardyń biri aitqan myna bir sóz erekshe esimde qaldy. Ol «men praimerizge depýtattyq tósbelgi úshin emes, jurttyń naqty máselelerin sheshýde partiialastarymdy qoldaý úshin qatysyp otyrmyn», dedi.
Aldaǵy 1 – 3 qazan aralyǵyndaǵy partiiaishilik sailaýda daýys berý úshin mobildik qosymshany júktep alyp, «Praimeriz 2020» aqparattyq júiesine tirkeldim. Búginde júiede 560 myńnan astam partiialas tirkeýden ótti. Elbasy aitqandai, ádil de tartysty básekede eń laiyqtylar jeńiske jetetine senimdimin», - deidi partiia ókili.
