Almaty ákimi halyqpen esepti kezdesýinde qalalyq politsiianyń jumysyn da tilge tiek etti, dep habarlaidy QazAqparat tilshisi.
Onyń aitýynsha, politsiianyń materialdyq-tehnikalyq qamtylýyna jergilikti biýdjetten 14 mlrd teńge baǵyttalǵan.
«Qazirgi tańda qalalyq politsiia videobaqylaý kameralarymen, GPS navigatorlarmen 87 paiyz qamtylǵan. Bul jumystar qalada sybailas jemqorlyq kórsetkishiniń sanyn azaitýǵa septigin tigizedi. Qala basshylyǵy politsiianyń jumys sapasyn kóteretinine senim artyp otyr. Kim osy úshin jumys istep, kúsh salmasa, ol adammen qosh aitysamyz. Júieni tazalaimyz. Byltyrdyń ózinde IID basshylyǵy 170 politsiia qyzmetkerin jumystan qýǵan. Politsiia qatarynda jumys isteitinder az ǵana jalaqyǵa túngi 12-ge deiin júredi. Olardyń kópshiligi Almaty oblysynda «vremiankalarda» turyp jatyr. Tańǵy 7-de jumysta bolýy kerek. Bul ońai jumys emes. Biz oinap-kúlip ómir súrip jatyrmyz. Bizdiń qaýipsizdigimizdi bireý kúzetip júr ǵoi», - dedi Baýyrjan Baibek.
Ákim politseilermen bolǵan keleńsiz oqiǵalardy eshkim ashyq jariialaǵysy kelmeitinin aitty.
«Qazir videotirkegishter, GPS navigatorlar bar. Kóp adamdar quqyqbuzýshylyqqa kýá bolsa da, aitýǵa qorqady. Al shaǵym aitýǵa kelgende bári myqty. Ondai nársege kýá boldyńyz ba, internetke jariialap jiberińiz, sózge kelmesten shara qabyldaimyz. Parany berýge qushtar adam kóp. Eger politseige eshkim para usynbasa, ol almas edi», - dedi ákim.
