الماتى ەكٸمٸ حالىقپەن ەسەپتٸ كەزدەسۋٸندە قالالىق پوليتسييانىڭ جۇمىسىن دا تٸلگە تيەك ەتتٸ, دەپ حابارلايدى قازاقپارات تٸلشٸسٸ.
ونىڭ ايتۋىنشا, پوليتسييانىڭ ماتەريالدىق-تەحنيكالىق قامتىلۋىنا جەرگٸلٸكتٸ بيۋدجەتتەن 14 ملرد تەڭگە باعىتتالعان.
«قازٸرگٸ تاڭدا قالالىق پوليتسييا ۆيدەوباقىلاۋ كامەرالارىمەن, GPS ناۆيگاتورلارمەن 87 پايىز قامتىلعان. بۇل جۇمىستار قالادا سىبايلاس جەمقورلىق كٶرسەتكٸشٸنٸڭ سانىن ازايتۋعا سەپتٸگٸن تيگٸزەدٸ. قالا باسشىلىعى پوليتسييانىڭ جۇمىس ساپاسىن كٶتەرەتٸنٸنە سەنٸم ارتىپ وتىر. كٸم وسى ٷشٸن جۇمىس ٸستەپ, كٷش سالماسا, ول اداممەن قوش ايتىسامىز. جٷيەنٸ تازالايمىز. بىلتىردىڭ ٶزٸندە ٸٸد باسشىلىعى 170 پوليتسييا قىزمەتكەرٸن جۇمىستان قۋعان. پوليتسييا قاتارىندا جۇمىس ٸستەيتٸندەر از عانا جالاقىعا تٷنگٸ 12-گە دەيٸن جٷرەدٸ. ولاردىڭ كٶپشٸلٸگٸ الماتى وبلىسىندا «ۆرەميانكالاردا» تۇرىپ جاتىر. تاڭعى 7-دە جۇمىستا بولۋى كەرەك. بۇل وڭاي جۇمىس ەمەس. بٸز ويناپ-كٷلٸپ ٶمٸر سٷرٸپ جاتىرمىز. بٸزدٸڭ قاۋٸپسٸزدٸگٸمٸزدٸ بٸرەۋ كٷزەتٸپ جٷر عوي», - دەدٸ باۋىرجان بايبەك.
ەكٸم پوليتسەيلەرمەن بولعان كەلەڭسٸز وقيعالاردى ەشكٸم اشىق جارييالاعىسى كەلمەيتٸنٸن ايتتى.
«قازٸر ۆيدەوتٸركەگٸشتەر, GPS ناۆيگاتورلار بار. كٶپ ادامدار قۇقىقبۇزۋشىلىققا كۋە بولسا دا, ايتۋعا قورقادى. ال شاعىم ايتۋعا كەلگەندە بەرٸ مىقتى. ونداي نەرسەگە كۋە بولدىڭىز با, ينتەرنەتكە جارييالاپ جٸبەرٸڭٸز, سٶزگە كەلمەستەن شارا قابىلدايمىز. پارانى بەرۋگە قۇشتار ادام كٶپ. ەگەر پوليتسەيگە ەشكٸم پارا ۇسىنباسا, ول الماس ەدٸ», - دەدٸ ەكٸم.
