Baýyrjan Baibek Nur Otan alańynda ózekti áleýmettik máselelerdi ashyq talqylaýǵa ýáde berdi, dep habarlaidy "Ult aqparat".
Nur Otan tóraǵasynyń birinshi orynbasary Baýyrjan Baibek Facebook paraqshasynda bileýshi partiianyń sailaýaldy ýádeleriniń oryndalýyn qalai qamtamasyz etetini jaily aitty.
Onyń aitýynsha, Partiia Lideri Nursultan Nazarbaevtyń tapsyrmasymen ár óńir, qala jáne aýdan úshin Nur Otan-nyń 217 sailaýaldy baǵdarlamasyn iske asyrý boiynsha egjei-tegjeili jol kartalary bekitilip, oǵan jaýapty depýtattar men oryndaýshylar belgilengen.
Jyldarǵa jáne naqty is-sharalarǵa bólingen 80 myńnan astam indikatorǵa qol jetkizý kózdelip otyr.
El Prezidenti Qasym-Jomart Toqaevtyń «Halyq únine qulaq asatyn memleket» tujyrymdamasyn iske asyrý aiasynda partiia qoǵamdyq keńesteriniń jumysy júieli túrde qaita qurylymdandy.
«Saiasi keńes Biýrosynyń sheshimimen taratylǵan partiialyq kýratorlar institýtynyń ornyna Nur Otan-nyń sailaýaldy baǵdarlamasynyń naqty baǵyttarynyń iske asyrylýyn baqylaý boiynsha 14 respýblikalyq qoǵamdyq keńes quryldy. Partiia Lideriniń alǵa qoiǵan mindetterin eskere otyryp, eń aldymen partiianyń sailaýaldy ýádeleriniń oryndalýyna júieli baqylaý, biýdjet qarajatynyń tiimdi jáne ashyq jumsalýyna monintoring jasaý qamtamasyz etiledi. Keńesterdiń mindetine eldiń, óńirler men ekonomikanyń naqty salalarynyń ózekti baǵyttary boiynsha balama saraptamalyq paiymdy tujyrymdaý kiredi. Keńesterdiń jumysy qoǵamdyq pikirdi eskerip, sondai-aq partiianyń qoǵamdyq qabyldaý bólmelerine el kóleminde azamattardan túsken ótinishterge jasalǵan taldaýǵa negizdele otyryp, jariia túrde júrgiziledi», – dedi partiia tóraǵasynyń birinshi orynbasary.
Sonymen qatar, Baýyrjan Baibek Nur Otan keńesteriniń aldynda sarapshylar qaýymdastyǵyn ózekti áleýmettik máselelerdi ashyq talqylaýǵa tartý, sondai-aq azamattyq bastamalarǵa qoldaý kórsetý mindeti turǵanyn da atap ótti.
«Qazirgi kezde atalǵan keńesterdiń quramyn jasaqtaý boiynsha qarqyndy jumys júrgizilip jatyr. Olardyń quramyna partiia depýtattary men belsendi múshelerinen bólek, úkimettik emes uiymdardyń ókilderi, sarapshylar, jalpy qoǵamdyq pikir kóshbasshylary jáne basqa da azamattar kiredi. Osyndai keńester óńirlik deńgeide de qurylmaq. Sondyqtan buǵan múddeli barsha azamattyq qoǵam ókilderin, belsendilerdi jáne qoǵam ómirine beijai qaramaityn azamattardy shynaiy yntymaqtastyqqa shaqyramyz. Aýyzbirshilik pen jaýapkershilik tanytyp, ashyq pikiralysý aiasynda áreket etý arqyly ǵana biz mejelegen josparlarymyzdyń barlyǵyn iske asyramyz», – dedi ol.
Partiia baspasóz qyzmetiniń aqparaty boiynsha, búgin «Nur Otan» partiiasy tóraǵasynyń birinshi orynbasary jańadan qurylǵan 14 keńestiń jańa tóraǵalarymen onlain-formatta kezdesý ótkizdi.
Saiasi keńes biýrosynyń sheshimimen atalǵan keńesterge Parlament Májilisindegi fraktsiianyń kelesi depýtattary taǵaiyndaldy: azamattyq qoǵam men memlekettik basqarýdy damytý boiynsha – Aidos Sarym, bilim men ǵylym – Juldyz Súleimenova, agrarlyq sektor – Berik Ospanov, ekonomika jáne kásipkerlikti qoldaý – Amanjan Jamalov, óńirlik damý – Iýliia Kýchinskaia.
Jastardy qoldaý boiynsha – Mádi Ahmetov, jumyspen qamtý men halyqtyń áleýmettik osal toptary jónindegi qoǵamdyq keńeske – Elnur Beisenbaev tóraǵa boldy.
Ult densaýlyǵy boiynsha – Larisa Pavlovets, al otbasy, áielder jáne balalardyń quqyqtaryn qorǵaý máseleleri jónindegi keńeske – Dinara Zákieva basshylyq jasaidy.
Sybailas jemqorlyqqa qarsy is-qimyl jónindegi respýblikalyq qoǵamdyq keńeske, «Miras», Ekologiialyq jáne Quqyqtyq keńesterge tiisinshe Erlan Sairov, Janarbek Áshimjanov, Eldos Abaqanov jáne Qanat Mýsin jetekshilik etedi.
