Foto: 7kun.kz
Premer-Ministr Oljas Bektenov Májilis depýtatty Nikolai Arsiýtinniń Baianaýylǵa biregei tarihi, ǵylymi jáne týristik áleýeti bar aýmaq retinde erekshe mártebe berýge qatysty saýalyna jaýap berdi, dep habarlaidy Ult.kz.
Premer-Ministr óz sózinde qazirgi ýaqytta qoldanystaǵy zańnamada «ǵylymdy qajetsinetin aýmaq» túsinigi men anyqtamasy qarastyrylmaǵanyn aitty.Sonymen qatar Qazaqstanda ǵylymdy qajetsinetin aýmaqtar qurýmen bailanysty máselelerdi sheshý maqsatynda Májilis depýtattary «Qazaqstan Respýblikasynyń keibir zańnamalyq aktilerine ǵylymdy qajetsinetin aýmaqtar máseleleri boiynsha ózgertýler men tolyqtyrýlar engizý týraly» QR zańy jobasyna bastamashylyq jasaǵan.
"Zań jobasy «ǵylymdy qajetsinetin aýmaq» túsinigin engizýdi, onyń ishinde jergilikti atqarýshy organdardyń ǵylymdy qajetsinetin aýmaqtardy damytýdyń keshendi josparyn ázirleýin, kelisýin jáne bekitýin, sonymen qatar ókiletti organǵa eldi mekenge ǵylymdy qajetsinetin aýmaq mártebesin berýdi usynýyn, joǵary ǵylymi-tehnikalyq komissiiada atalǵan ǵylymdy qajetsinetin aýmaq úshin basym ǵylymi baǵyttardy aiqyndaýyn kózdeidi. Úkimettiń zań jobasyna qorytyndysy Májiliske engizildi. Joǵaryda aitylǵandy eskere otyryp, Baianaýyl aýdan ortalyǵyna ǵylymdy qajetsinetin aýmaq mártebesin berý máselesi tiisti zań jobasy qabyldanǵannan keiin ǵana qarastyrý múmkin bolady dep esepteimin, - dedi Úkimet basshysy.
Aita keteiik, depýtat Arsiýtin Oljas Bektenovke joldaǵan depýtattyq saýalynda óńirlerdiń mádeni murasyn saqtaý jáne strategiialyq damytý maqsatynda Pavlodar oblysyndaǵy aýdan ortalyǵy - Baianýylǵa biregei tarihi, ǵylymi jáne týristik áleýeti bar aýmaq retinde erekshe mártebe berý týraly aitqan. Ol óz sózinde Baianaýyl aýdan ortalyǵyna erekshe mártebe berý – óńirdiń áleýmettik-ekonomikalyq damýyna tyń serpin beretin mańyzdy sheshim bolmaq. Bul bastama birqatar naqty tiimdilikterge qol jetkizýge múmkindik beredi.
