Elimizge belgili óner juldyzdary kópbalaly analardyń talap-tilegine qatysty oilaryn ártúrli áleýmettik jelide bólisip jatyr. Tanymal prodiýser Baian Alagózova da kópbalaly analardyń janaiqaiyn jetkizýge tyrysqan. Ol analardyń talaby oryndy ekenin aityp, ministrlerge ótinishin jazdy.
“Kópbalaly analardyń sanyna qaraǵanda, bizde demografiialyq jaǵdai jaqsy. Áleýmettik jeli qoldaýdy surap, kómek talap etken analardyń aiqaiyna toly. Olar járdemaqyny kóbeitip, baspana suraidy. Balaǵa mektepterde tegin as berip, jolaqysyn tegin qylýdy suraidy. Bul - durys talap. Eńbek jáne áleýmettik qorǵaý ministrligi bul máselege bes balanyń óliminen soń ǵana nazar aýdardy. Men - eńbek ministri emespin. Men de anamyn. Memleket aldymen balalardy, bolashaǵymyzdy qorǵaýy kerek dep oilaimyn. Bárinen qorqynyshtysy – jasyrý múmkin bolmai ketkende shyndyqty aitý. Jylap turyp, shyndyqty aityp jatqandardyń sózine qulaq asý kerek”, – dep jazdy Alagózova jelide.
Prodiýser qandai jaǵdaida da analardyń jaǵynda ekenin aityp, olardyń talap-tilegi oryndy ekenin jetkizgen. Bul máseleniń óte ózekti ekenin de atap ótedi.
“Ministr myrzalar, oianyńyzdar, halyqty tyńdańyzdar! Balalar baqytty bolsa eken deimin. Elimizdiń damyǵanyn qalaimyn. Qurmetti áielder, men barynshy sizder jaǵyndamyn. Qai ana bolsa da esh qiynshylyqqa qaramastan balalaryn jaqsy kóre bermek, biraq bilik shyndyqqa týra qaraýy kerek. Bul postty jazyp otyrǵan sebebim – árbir ananyń ár balanyń taǵdyry meni de alańdatady. Tek baqytty ana ǵana deni saý urpaq tárbielei alady. Al, analardyń kóz jasyn Qudai estitini anyq. Osynsha kóp ana jalǵan sóileýi múmkin emes. Buǵan kóz jumýǵa bolmaidy. Jańalyq úsh kún ǵana ómir súrýi múmkin, biraq bul jolǵy másele ondai emes”, – dep jazdy prodiýser.
