Osymen birneshe kún boiy qazaq qoǵamy qytailyqqa turmysqa shyqqan qazaq qyzynyń ómirin talqylap jatyr. Uzatýdan túsirilgen video áleýmettik jelige tarap, jurttyń ashýyn týǵyzǵan bolatyn. Al, qoǵamda qalyptasqan ustanymdarǵa únemi qarsy shyǵyp júretin tanymal prodiýser Baian Alagózova bolsa boijetken durys jasady dep otyr.
Qazaq jastaryn mahabbat jolynda «qurban» bolýǵa úgittep júrgen Baiannyń ózi kezinde mahabbaty úshin kúieýiniń kózine shóp salyp, bir ólimnen aman qalǵan bolatyn. Endi ol «mahabbat ultqa qaramaidy» degen ustanymda.
«Qazaq jigitteri bizdiń qyzdardyń ózge ult ókiline turmysqa shyǵýyna qarsy eken. Olardyń bireýdiń ómirine aralasqandaryna qarap jaǵamdy ustadym. Mundai nekege qarsy bolǵandar mahabbatty túsinbeitin adamdar. Mahabbat ultqa qaramaidy. Men ózge ultqa turmysqa shyǵýǵa qarsy emespin jáne qoldap ta turǵan joqpyn. Biraq maǵan mahabbat mańyzdy. Mahabbat ǵana áieldi baqytty etedi. Ol sol súigen adamynan ǵana bala súigisi keledi. Damyǵan elderde bireýdiń ómirine aralasý, ol sanasyzdyqty bildiredi. Biz qashanǵa deiin qazaq jigitteriniń osyndai qylyqtaryna tóze bermekshimiz? Qyzdarymyz kúieýgýe tiiý úshin erkekterden ruqsat suraýy kerek pe? Eger qazaq qyzdary tek ózderińe turmysqa shyqsyn deseńder, onda aldymen áieldi syilai bilýdi úirenip alyńdar. Biz damyǵan memlekette turamyz deimiz. Biraq, bizde tek erkekter ǵana táýelsiz. Olarǵa birneshe áiel alýǵa ruqsat. Áielge qol da kótere alady. Ary qarai jalǵastyra berse kóp. Osyǵan qarap qorqamyn», – deidi Baian óziniń Instagram-paraqshasynda.
Sondai-aq, prodiýser bolashaqta óziniń qyzy da ózge ult azamatyn súiip jatsa, onda oǵan esh qarsy bolmaitynyn aitty.
